საქართველოს პრეზიდენტ მიხეილ სააკაშვილის შეფასებით, 70-იან წლებში კათალიკოს-პატრიარქ ილია მეორის სახით საქართველოს მეორე ილია ჭავჭავაძე მოევლინა.
"მე-19 საუკუნეში ილია ჭავჭავაძემ შეძლო ახალი ქართული იდენტურობის ჩამოყალიბება, რომელიც ჩვენს მრავალსაუკუნოვან ტრადიციებს ეფუძნებოდა, მაგრამ იმის გამო, რომ ჩვენი არისტოკრატია კორუმპირებული იყო, ხალხიც თანდათან შორდებოდა ფუძეს. ჭავჭავაძემ ყველაზე რთულ პერიოდში მოახერხა ქართული იდენტურობის გაცოცხლება და აღორძინება", - აღნიშნა სააკაშვილმა.
მისი თქმით, მე-19 საუკუნის მსგავსად გასული საუკუნის 70-იან წლებში საქართველოს დიდი საფრთხე დაემუქრა.
"70-იან წლებში ყველაზე მეტად დაემუქრა საფრთხე საქართველოს იდენტურობის და ამ დროს მოვიდა მეორე ილია, მისი უწმინდესობა ილია მეორე და ზუსტად იგივე გააკეთა, რაც ჭავჭავაძემ", - აღნიშნა პრეზიდენტმა.
მისი შეფასებით, ადამიანის ასაკი წლებით კი არ განისაზღვრება, არამედ იმით, თუ რამდენად ჯდება თანამედროვეობაში.
"ავე მარია", რომელიც გერმანიაში ფაქტობრივად ჩემ თვალწინ შეიქმნა, არის ძალიან დიდი დამსახურების მქონე ქართველის და ძალიან ახალგაზრდა ადამიანის, საქართველოს პატრიარქის შექმნილი. მან საკუთარი ხელით ააღორძინა ქართული ხატწერა, მაშინ, როდესაც ეკლესიები და ქართული ხატები გადაგვიღებეს და ეს დღესაც გრძელდება. ამის მაგალითი ჩვენი ილორის წმინდა გიორგის ტაძარია", - განაცხადა სააკაშვილმა პატრიარქის რუსთაველის პრემიით დაჯილდოების დროს, ქუთაისში ბალანჩივაძეების სახელობის "Music Hall"-ის გახსნის ღონისძიებაზე.
