საგანგებო სიტუაციების მართვის სამსახურის ორგანიზებით, 14 მარტს, კახეთის რეგიონში, ქალაქ ყვარელში, სამოქალაქო უსაფრთხოების კომპლექსური სამაშველო სწავლება „დურუჯი 2024“ გაიმართება.
სიმულაციური სწავლების ფარგლებში, ყვარელში, ჩაირთვება განგაშის გამაფრთხილებელი სისტემა, განხორციელდება პრაქტიკული სამაშველო მოქმედებები, მათ შორის მოხალისეების ევაკუაცია.
სამაშველო ღონისძიებაში მონაწილეობას მიიღებს 250 მეხანძრე-მაშველი შესაბამისი აღჭურვილობით, ასევე, საპოლიციო დანაყოფები, ეროვნული გვარდია, სამედიცინო დახმარების ჯგუფები და სასაზღვრო პოლიციის ვერტმფრენი.
სწავლებაში ჩაერთვება 500-მდე ადგილობრივი მოხალისე. მათთან საგანგებო სიტუაციების მართვის სამსახურის თანამშრომლების მიერ, საინფორმაციო შეხვედრები გაიმართა, სადაც დეტალურად გაეცნენ ღონისძიების მიმდინარეობასა და სამოქმედო გეგმას.
სამაშველო სწავლების შესახებ, რეგიონში მყოფი მოქალაქეების ინფორმირების მიზნით, 112-დან გამაფრთხილებელი შეტყობინებები გაიგზავნება.
ღონისძიების მიზანია, გადაუდებელი შემთხვევების დროს, ყვარელში არსებული განგაშის გამაფრთხილებელი სისტემის ტესტირება, საგანგებო სიტუაციაზე რეაგირებისა და კოორდინირებული მოქმედებების დახვეწა და მოსახლეობის ცნობიერების ამაღლება.
