2011 წელის საქართველოში ქუთაისის წელი იქნება. ამის შესახებ საქართველოს პრეზიდენტმა მიხეილ სააკაშვილმა დღეს ქუთაისში "თი-ბი-სი" ბანკის რეგიონალური ოფისის მშენებლობის მონახულებისას განაცხადა.
"მინდა მოგილოცოთ ეს დღე და ვუთხრა იმათ ვისაც არაფერი არ სჯერა არასდროს და ვისაც ეგონა, რომ ქუთაისისგან არაფერი არ დაგებოდა. ეს არის საქართველოს არა მხოლოდ ერთ-ერთი ულამაზესი ქალაქი, არამედ ძალიან მაგარი, დახვეწილი ევროპული ქალაქი", - აღნიშნა პრეზიდენტმა.
მისივე თქმით, საკუთარ დაბადების დღეზე იგი ქუთაისის ერთ-ერთ კაფეში იჯდა ოჯახთან ერთად, სადაც ისეთი გარემო იყო, რაზეც რამდენიმე წლის წინ ოცნებაც კი არ შეიძლებოდა.
"2011 წელი საქართველოში მთლიანად არის ქუთაისის წელი, იმ გაგებით, რომ ქუთაისში მომავალ წელს დასრულდება პარლამენტის შენობა, მთავრობის ახალი კანცელარიის შენობა, გაიხსნება ახალი საწარმოები, რაც არის ახალი სამუშაო ადგილი, უამრავი დასაქმებული ადამიანი და კარგი პერსპექტივა ახალგაზრდობისთვის", - დასძინა სააკაშვილმა.
მისვე შეფასებით, მაშინ, როდესაც საქართველოს მსგავს პატარა ქვეყნებს მხოლოდ ერთი დიდი ქალაქი, დედაქალაქი აქვს, საქართველოში რამდენიმე ქალაქის განვითარება ერთობლივად მიმდინარეობს, რომლებიც არის ქვეყნის კულტურული, საგანმანათლებო ცენტრები, სადაც არის დასასვენებლად ბევრი ადგილი.
"ამ კუთხით ქუთაისი ძალიან მნიშვნელოვანი ცენტრია, არა მხოლოდ საქართველოსთვის, ასევე კავკასიისთვის", - აღნიშნა პრეზიდენტმა და აქვე დასძინა, რომ მან თავის დაპირება შეასრულა, რომელიც მოსახლეობას მისცა, თუმცა არიან ადამიანები ვისაც მაინც არ სჯერა, ამიტომ სააკაშვილი მათ მოუწოდებს, რომ "ვისაც გვჯერა გაგვატარეთ".
