კანადის საგარეო საქმეთა მინისტრმა მელანი ჟოლიმ უკრაინაში რუსეთის სრულმასშტაბიანი შეჭრის ორი წლისთავთან დაკავშირებით რუსეთის წინააღმდეგ სანქციების დაწესების შესახებ განაცხადა.
კანადის ახალი სანქციები მიღებულ იქნა დიდ ბრიტანეთთან და აშშ-სთან კოორდინაციით, რომლებმაც უკვე გამოაცხადეს შესაბამისი შეზღუდვები. კანადის სანქციები შეეხება 10 ფიზიკურ და 153 იურიდიულ პირს. მათ შორის არიან ვლადიმირ პუტინის თანაშემწე, ასევე რუსეთსა და კვიპროსში რეგისტრირებული კერძო და საჯარო კომპანიების ოფიციალური პირები.
კანადის საგარეო საქმეთა სამინისტროში განმარტავენ, რომ სანქციებს დაქვემდებარებული სუბიექტების უმეტესობა რუსეთის თავდაცვის სამინისტროს აწვდის კალიბრის რაკეტებისა და თვითმფრინავების კომპონენტებს, ასევე უწევს სადაზღვევო მომსახურებას.
კანადამ ასევე გამოაცხადა რუსეთში 20-ზე მეტი დასახელების პროდუქტის ექსპორტის აკრძალვა, რომლებიც შეიძლება გამოყენებულ იქნას იარაღის დასამზადებლად და უკრაინის წინააღმდეგ ომში გამოსაყენებლად, ეს არის ასაფეთქებელი ნივთიერებები, განსაკუთრებით დეტონატორები, რომლებიც გამოიყენება სამთო და სამშენებლო სფეროებში.
გარდა ამისა, კანადა აძლიერებს სანქციების რეჟიმს რუსეთის ფედერაციის წინააღმდეგ. ამიერიდან, შეზღუდვები შეიძლება მიმართული იყოს ნებისმიერის მიმართ კანადის ფარგლებს გარეთ, ვინც არღვევს უკრაინის სუვერენიტეტსა და ტერიტორიულ მთლიანობას.
