ომის დაწყებიდან უკრაინაში რუსი სამხედროების მიერ ბავშვებზე სექსუალური ძალადობის სულ მცირე 13 შემთხვევა გამოვლინდა.
გერმანული უფლებადამცველი ორგანიზაცია Kindernothilfe იუწყება, რომ 13 შემთხვევა უკვე დოკუმენტირებულია და მიმდინარეობს გამოძიება, ყველაზე პატარა მსხვერპლი ოთხი წლის ბავშვია.
Reuters-ის ცნობით, საუბარია ძალადობის შემთხვევაზე, რომელიც მოხდა 2022 წლის მარტში, კიევის რეგიონში, ბროვარში. მთვრალი რუსი ჯარისკაცები შეიჭრნენ სახლში, სადაც ახალგაზრდა ოჯახი ცხოვრობდა, სცემეს კაცს, შემდეგ კი სექსუალურად იძალადეს მეუღლეზე და ოთხი წლის ქალიშვილზე. ამ ეტაპზე ორივე ბრალდებული ჯარისკაცი დიდი ალბათობით გარდაცვლილია.
უფლებადამცველების თქმით, რუსული არმია იყენებს ბავშვებზე სექსუალურ ძალადობას, როგორც „აგრესიული ომის“ ტაქტიკას, ძალადობის რეალური შემთხვევები კი გაცილებით მეტია, მსხვერპლთა უმეტესობა და მათი მშობლები შიშის გამო ასეთ ინციდენტებს მალავენ.
„ღრმად ამაზრზენი და მიუღებელია, რომ უდანაშაულო ბავშვებს ომში იარაღად იყენებენ. ასეთი ბარბაროსული ტაქტიკის გამოყენება კაცობრიობის სირცხვილია. პასუხისმგებელი პირები უნდა დაისაჯონ“, - თქვა Kindernothilfe-ის აღმასრულებელმა დირექტორმა კარსტენ მონტაგმა. მისი თქმით, ეს ტაქტიკა გამოიყენება მოსახლეობის დასამორჩილებლად და დასაშინებლად.
უკრაინის ყოფილი ომბუდსმენი ლუდმილა დენისოვა 2022 წლის აპრილში აცხადებდა, რომ ბუჩაში, კიევის რეგიონში, რუსი ჯარისკაცები სარდაფში 14-24 წლის ასაკის დაახლოებით 25 გოგონასა და ქალს მალავდნენ და რეგულარულად აუპატიურებდნენ ცხრა მათგანი დაორსულდა. გაერო-მ უკრაინაში გაუპატიურების შესახებ ცნობების გამოძიება მოითხოვა.