დანილოვი ისეთ ბუად წარმოადგინეთ, გეგონება, ბაიდენი ჩამოდის და გვეუბნება, ახლა ტანკები დაქოქეთ და მიდით, რუსეთს შეუტიეთო, – ამის შესახებ „გირჩის“ წევრმა, სანდრო რაქვიაშვილმა პარლამენტის პლენარულ სხდომაზე სიტყვით გამოსვლისას განაცხადა, სადაც პარლამენტის საქმიანობის 2023 წლის ანგარიშსა და 2014 წლის სამოქმედო გეგმას განიხილავენ.
„ომი ახსენეთ და გააკრიტიკეთ ოპოზიცია, რომ თურმე ჩვენ აქ რაღაცნაირად მხარს ვუჭერდით რაღაცას. შეიძლება, ჩემს პოზიციას არ გულისხმობდით, მაგრამ ნებისმიერ შემთხვევაში… რაშია საქმე – „ომი გინდას“ კამპანია რომ იყო, ერთ-ერთი მთავარი ბუა, რომელიც თქვენ გამოიყენეთ, იყო დანილოვი. „აი, დანილოვმა ეს თქვა“. რომ შეხედოთ თვითონ უკრაინის პოლიტიკოსები რას ამბობენ დანილოვზე, ისინი ამბობენ, რომ ეს არის ადამიანი, რომელსაც ყველაზე კარგი სამსახური აქვს მსოფლიოში, რადგან ფულს უხდიან და არაფერს აკეთებს. თვითონ უკრაინელი პოლიტიკოსები ასე აფასებენ მის თანამდებობას და მის გავლენებს უკრაინულ პოლიტიკაში. გასაგებია, რომ უზარმაზარი ქვეყანაა, უამრავი პოლიტიკოსია და ვიღაცამ რაღაც თქვა. თქვენ ისეთ ბუად წარმოადგინეთ, გეგონება, ბაიდენი ჩამოდის და გვეუბნება, ახლა ტანკები დაქოქეთ და მიდით, რუსეთს შეუტიეთო. არაფერი მსგავსი ხომ არ მომხდარა. სინამდვილეში, იქამდე მიდის, რომ აგერ ბორელი გვეუბნება, არასდროს აღგვიქვამს სერიოზულად ეს განცხადებებიო. ხომ რაღაცნაირად უხერხული უნდა იყოს, როდესაც თქვენ არც ერთი მტკიცებულება არ დაგიდიათ, მაგრამ ასეთი მეორეხარისხოვანი პოლიტიკური მნიშვნელობის განცხადებების მეშვეობით ააწყვეთ რაღაც ასეთი ვირტუალური საფრთხე, რომლისაც ბევრ ჩვენს მოქალაქეს შეეშინდა ლეგიტიმურად“, – აღნიშნა სანდრო რაქვიაშვილმა.