„ნაცმოძრაობა“ როდესაც ებრძოდა ყველაფერ ქართულს, იდენტობას, ამბიონებზე უვარდებოდნენ მღვდლებს, ეკლესიებში ვარდებოდნენ, ბიძინა ივანიშვილმა მაშინ გადაარჩინა ქართული სულიერება „ნაცებისგან“, – ამის შესახებ „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.
„შეკვეთილი სტატიები, ე.წ. რუსული კანონი რომ დაარქვეს აქ, ამერიკაში მოქმედი ამ კანონის თანახმად გამოქვეყნდა დოკუმენტები, ხომ ვნახეთ, რომ საქართველოდან, უცხოეთიდან კონკრეტული შეკვეთები იყო, მილიონობით დოლარი იხარჯება იმისთვის, რომ ბიძინა ივანიშვილს დაარტყან“, – აღნიშნა მამუკა მდინარაძემ.
მდინარაძის თქმით, ბიძინა ივანიშვილს ქველმოქმედებაში სამ მილიარდ დოლარზე მეტი აქვს დახარჯული.
„ამ ქველმოქმედების ძირითადი, 90-95 პროცენტზე მეტი იხარჯებოდა ეკლესია-მონასტრების მშენებლობა-რეაბილიტაციაზე, კულტურის ობიექტების მშენებლობა-რეაბილიტაციაზე, კულტურისა და ხელოვნების მოღვაწეების დაფინანსებაზე და ამ მიმართულებით ყველაფერზე, რაც ასოცირდებოდა ქართულ იდენტობასთან, მის შენარჩუნებასთან“, – განაცხადა მამუკა მდინარაძემ.
მისივე თქმით, ბიძინა ივანიშვილს ის ადამიანები აკრიტიკებენ, რომლებიც ყოველდღე იყიდებიან თვეში ორი ათას დოლარად.
„2 მილიარდზე, რომლითაც აშანტაჟებდნენ, ისე თავისუფლად ლაპარაკობენ ვიღაც-ვიღაცები და ისე არ აქცევენ ყურადღებას, თითქოს არაფერია. ადამიანები, რომლებიც თვეში 2 ათას დოლარად იყიდებიან ხოლმე, რომელიღაც მიმართულებიდან წამოსული ხელფასებით ანტიეროვნულ განცხადებებს აკეთებენ, ყოველდღე იყიდებიან თვეში ორი ათას დოლარად, ასეთი ადამიანები აკრიტიკებენ და არაფრად მიაჩნიათ, რომ ორი მილიარდითაც კი ადამიანი ვერ დააშანტაჟეს. ამ ადამიანს საერთოდ არ გაუფიქრია, რომ ამ ორ მილიარდთან დაკავშირებით საქართველოს საწინააღმდეგო კი არა, რაიმე ელემენტარულ დათმობაზე და კომპრომისზე წასულიყო. არის თუ არა ეს ისტორიული მაგალითი, როგორ არ იყიდება ქვეყანა?“ – განაცხადა მამუკა მდინარაძემ.
