კომპანიას, რომელიც კალაძემ წერეთლის გამზირის რეაბილიტაციიდან გააგდო უხარისხოდ შესრულებული სამუშაოების გამო, ნაცვლად შავ სიაში შეყვანისა, გაუფორმდა 15-მილიონიანი ხელშეკრულება რეგიონული განვითარებისა და ინფრასტრუქტურის სამინისტროს მიერ - ამის შესახებ განაცხადა თბილისის საკრებულოს ფრაქცია “ერთიანი ნაციონალური მოძრაობის” თავმჯდომარემ, ირაკლი ნადირაძემ.
მისი თქმით, აღნიშნული კომპანია დაკავშირებულია “ქართულ ოცნებასთან”. -
“კომპანია, რომელიც კახი კალაძემ წერეთლის გამზირის რეაბილიტაციიდან გააგდო და თქვა, რომ უხარისხოდ იყო სამუშაოები შესრულებული, დროში ვერ ჩაეტია და ეს ნამდვილად ასე იყო, ხელშეკრულების შეწყვეტიდან რამდენიმე დღეში იმის ნაცვლად, რომ შეეყვანათ შავ სიაში, რეგიონული განვითარების და ინფრასტრუქტურის სამინისტრომ მისცა დაახლოებით 15 მილიონი ლარის კონტრაქტი. საუბარია კასპი-ახალქალაქის საავტომობილო გზის დაახლოებით 11 კმ-ზე და მერე თუ გაგიკვირდებათ - რატომ ჩავარდა ხიდი, რატომ ჩაინგრა გზა - პასუხი არის მარტივი - კორუფცია, ნეპოტიზმი. კომპანია, რომელიც რეალურად უნდა იყოს შავ სიაში, ეს კომპანია იღებს 15 მილიონ ლარს და რატომ? იმიტომ, რომ ეს კომპანია, ეს პირი დაკავშირებულია “ქართულ ოცნებასთან.” - განაცხადა ირაკლი ნადირაძემ.
