შეწყალების რეკომენდაცია შეწყალების კომისიამ 100 პატიმარს მისცა, რომელთაგან 6 ქალია 1 არასრულწლოვანი, _ ამის შესახებ სახალხო დამცველმა გიორგი ტუღუშმა შეწყალების კომისიის სხდომის დასრულების შემდეგ განაცხადა.
"100 პატიმრიდან 70-ს სრულად გათავისუფლების რეკომენდაცია მიეცა. დანარჩენს კი, სასჯელის განახევრების", _ განაცხადა ტუღუშმა და აღნიშნა, რომ ფრთხილად მოეკიდნენ მძიმე კატეგორიის დანაშაულში მსჯავრდებულთა განაცხადებს, თუმცა საშუალო სიმძიმის დანაშაულში მსჯავრდებულებთან მიმართებაში გაითვალისწინეს მათი ჯანმრთელობის მდგომარეობა, ტუბერკულიოზი, "C" ჰეპატიტი და სხვადასხვა მძიმე დაავადებები.
შეწყალების კომისიის სია პრეზიდენტთან გადაიგზავნება, რის შემდეგაც პრეზიდენტი სიას საახალწლოდ ხელს მოაწერს.
შეწყალების კომისიის სხდომა პრეზიდენტის რეზიდენციაში გაიმართა. კომისია 200-მდე მსჯავრდებულის საქმეს განიხილავდა. შეწყალების კომიიის თავმჯდომარის, ელენე თევდორაძის ინფორმაციით, ბევრ საქმეზე ითქვა უარი, რადგან ზოგიერთს სასჯელაღსრულების დაწესებულებიდან ცუდი დახასიათება ჰქონდა, ზოგს კი სასჯელის ის ვადა არ აქვს მოხდილი, რაც კომისიას შეწყალების შესაძლებელობას აძლევს.
მისი თქმით, შეწყალებაზე უარი არ ნიშნავს საბოლოოდ უარს. მსჯავრდებულებს უფლება აქვთ ექვსი თვის შემდეგ კვლავ მიმართონ პრეზიდენტს შეწყალებისთვის.
