საქართველომ აღნიშნულ დოკუმენტთან დაკავშირებით შეინარჩუნა ბოლო წლებში არსებული პრაქტიკა, რაზეც ინფორმირებული არიან ჩვენი პარტნიორები, – ასე პასუხობს საქართველოს საგარეო საქმეთა სამინისტრო კითხვას, რატომ არ შეუერთდა საქართველო „მაგნიტსკის სიის“ 2026 წლის 8 დეკემბრამდე გახანგრძლივებას.
ამასთან, როგორც უწყებაში აცხადებენ, ევროკავშირის განცხადებებთან მიერთების სტატისტიკა ბოლო ერთ წელიწადში 50 პროცენტამდეა გაზრდილი.
„საქართველომ აღნიშნულ დოკუმენტთან დაკავშირებით შეინარჩუნა ბოლო წლებში არსებული პრაქტიკა, რაზეც ინფორმირებულები არიან ჩვენი პარტნიორები. რაც შეეხება ზოგადად, ევროკავშირის განცხადებებთან მიერთების სტატისტიკა ბოლო ერ წელიწადში მკვეთრად – 50 პროცენტამდეა გაზრდილი“, – აცხადებენ საგარეო საქმეთა სამინისტროში.
საქართველო "მაგნიტსკის სიის" 2026 წლის 8 დეკემბრამდე გახანგრძლივების შესახებ ევროკავშირის გადაწყვეტილებას არ შეუერთდა.
როგორც საგარეო და პოლიტიკის უსაფრთხოების საკითხებში ევროკავშირის უმაღლესი წარმომადგენლის, ჯოზეფ ბორელის სახელით გამოქვეყნებულ განცხადებაშია აღნიშნული, ე.წ. მაგნიტსკის სიის ფარგლებში სანქციების გახანგრძლივებას მხარი დაუჭირეს ევროკავშირის წევრობის კანდიდატმა ქვეყნებმა - ჩრდილოეთ მაკედონიამ, მონტენეგრომ, ალბანეთმა, უკრაინამ, მოლდოვამ და ბოსნია და ჰერცეგოვინამ. ხელმომწერებს შორის არიან ლიხტენშტაინი, ნორვეგია და ისლანდია.
ამასთან, მოგვიანებით სომხეთი და აზერბაიჯანი ამოიღეს იმ ქვეყნების სიიდან, რომლებმაც "მაგნიტსკის სიის" ევროპული ანალოგის 2026 წლის 8 დეკემბრამდე გახანგრძლივების შესახებ ევროკავშირის გადაწყვეტილებას მხარი დაუჭირეს.
ევროპული საბჭოს ვებგვერდზე გამოქვეყნებული ინფომაციით, საქართველომ, როგორც ევროკავშირის წევრობის კანდიდატმა ქვეყანამ, მხარი დაუჭირა ევროკავშირის მიერ ჩრდილოეთ კორეისა და არაღიარებული დნესტრისპირეთის ლიდერების მიმართ სანქციების ვადის გახანგძლივებას.
