დღეს, 24 დეკემბერს, "ოქროს პერგამენტის" 2010 წლის ლაურეატების დაჯილდოების ცერემონიალი გაიმართა.
ახალი ამბების სააგენტო "ჯი-ეიჩ-ენმა" წელს ოქროს პერგამენტი 11 ნომინაციაში გასცა. წლის პოლიტიკოსი მიხეილ სააკაშვილი, წლის ბიზნესმენი გიორგი ჭირაქაძე, წლის ჟურნალისტი დავით კიკალიშვილი, წლის სპორტსმენი კი გარდაცვალების შემდეგ ნოდარ ქუმარიტაშვილი გახდნენ.
წლის პროექტად "განახლებული ბათუმი" და "ძველი თბილისის ახალი სიცოცხლე" დასახელდნენ, წლის კომპანიად "ავერსი", წლის კომუნიკატორად "ბილაინი", წლის ბრენდად კი "ლიბერთი ბანკი".
საუკეთესო წლის უცხოურ კომპანიად აღიარებითვის "ოქროს პერგამენტი" მიიღო "სოკარმა".
წლის ადამიანი გახდა პაატა ბურჭულაძე, სპეციალური პრიზი კი პროექტ "გმირისთვის" თამარ ფხაკაძეს გადაეცა.
შესაბამისი გამოკითხვა საინიციტივო კვლევით ჯგუფმა "ჯი-სი-ჯიმ" ჩაატარა და მასში მონაწილეობა 2600-მდე რესპონდეტმა მიიღო.
"მიმდინარე წელს გამოკითხვა განსხვავებული ფორმით ჩატარდა. რესპოდენტებს თავისუფალ რეჟიმში შეეძლოთ დაესახელებინათ წლის ადამიანი, სხვა ნომინაციებში კი ანკეტებში შეყვანილი იყვნენ კანდიდატები, რომელებიც საინიციატივო ჯგუფებმა და ცალკეულმა ორგანიზაციებმა წარმოადგინეს", - განაცხადა სააგენტო "ჯი-ეიჩ-ენის" გენერალურმა დირექტორმა გოჩა მირცხულავამ.
ღონისძიებას კომპანია "ბაგრატიონმა" უმასპინძლა. ღონისძიების სპონსორები იყვნენ კომანიები WE ARE, ითი და არტ ფლორ დიზაინი.
