მე, ჩემს კოლეგებთან ერთად, დღეს შირაქის ველზე ვარ, დედოფლისწყაროში. ოპოზიციიდან დღეს, გახარია არის ბერლინში, „ნაცები“ ლონდონში, ზოგი ბრიუსელში, ზოგი სად და ზოგი სად, მაგრამ არ არიან ქართველ ხალხთან, - ამის შესახებ შირაქის ველზე მყოფმა პარლამენტის თავმჯდომარემ, შალვა პაპუაშვილმა ჟურნალისტებს განუცხადა.
„უნდათ რომ იყვნენ კომფორტში და ასფალტზე. ჩავიდნენ ხალხთან რეგიონში და ელაპარაკონ ქართველ ხალხს. უყურებენ იმას, რას ეტყვის, რომელიღაცა უცხო პარლამენტის წევრი, რას ეტყვის ელჩი.
მთელი რადიკალური ოპოზიციის მთელი პოლიტიკა აწყობილია იმაზე, რა თქვა, გუშინ რასა იუკნევიჩიანემ და რას იტყვის დღეს რომელიღაცა პირობითი ევროპარლამენტარი, თუ სხვა ქვეყნის პარლამენტარი. ეს არის რადიკალური ოპოზიციის ფუნდამენტური კრიზისი. 30-წლიანი დამოუკიდებლობის პირობებში დღეს მივიღეთ ისეთი გარემოება, რომ მთელი რადიკალური ოპოზიცია უყურებს არა ხალხს და ქვეყნისკენ იყურება, არამედ იყურება გარეთ, რას ეტყვის სხვა ხალხების რჩეული, რომლებიც პირდაპირ გვეუბნებიან, გერმანიის ელჩმაც ახლახან პირდაპირ თქვა, რაც ბანალური ჭეშმარიტებაა, რომ ისინი ატარებენ თავიანთი ქვეყნის ინტერესებს. გერმანიის ელჩი აქ არ ატარებს საქართველოს ინტერესს, ის ატარებს გერმანიის ინტერესს.
ინგლისის ელჩი არ ატარებს აქ ქართველი ხალხის ინტერესებს, აქ ჩამოსულია ბრიტანეთის ინტერესების გასატარებლად. როგორც კი დადგება სასწორზე გერმანიის ინტერესები და საქართველოს ინტერესი გერმანიის ელჩი აირჩევს გერმანიის ინტერესს“, -განაცხადა პაპუაშვილმა და დასძინა, რომ „ზოგიერთს, რადიკალურ ოპოზიციაში, არ უნდა შეიგნოს ის, რომ იქ, სადაც ისინი ტრიალებენ, საქართველოს ინტერესებზე არ არის საუბარი, არამედ საუბარი არის მათი ქვეყნების ინტერესებზე“.
ამასთან, პაპუაშვილის შეფასებით, ოპოზიციაში ხელოვნური დაპირისპირებაა.
„ეს არის ხელოვნური დაპირისპირება. მცდელობა იმის წარმოსახვისა, რომ რადიკალურ ოპოზიციაში თითქოს არსებობს „ნაცები“ და „არანაცები“. სინამდვილეში, ჩვენ ბევრჯერ დავრწმუნდით, რომ რადიკალური ოპოზიციის არსი არის ერთი - რადიკალური ოპოზიციის გუნდი, ეს არის „ნაციონალური მოძრაობის“ გუნდი და „ნაცობა“ არ ნიშნავს იმას, რომ იყო „ნაციონალური მოძრაობის“ პარტიის წევრი, ეს არის იდეოლოგია,რომელიც გულისხმობს იმას, რომ სხვა ქვეყნების ინტერესებში უნდა მოქმედებდე და ის უნდა დააყენო უპირატესად, ვიდრე შენი ხალხი და ხალხის ინტერესი.
ვხედავთ, რომ ბარიერგადალახული ოთხი რადიკალური ოპოზიციის პარტიიდან ორი აცხადებს მონაწილეობას მიიღებს, ორი ამბობს, რომ მონაწილეობას არ მიიღებს [თვითმმართველობის არჩევნებში]. ეს არის წარმოსახვითი მცდელობა, იმისთვის რომ თითქოს ჩააჩოჩონ, გააქრონ „ნაციონალური მოძრაობა“ და ქართველ ხალხს კვლავ გარედან დადგმული სცენარით აჩვენონ, თითქოს მოვიდა ახალი ძალა, რომელიც კავშირში არ არის“ ნაციონალურ მოძრაობასთან“,- განაცხადა პაპუაშვილმა.
პაპუაშვილის თქმით, პარტიას - „გახარია საქართველოსთვის“ „ნაციონალურ მოძრაობასთან“ თვითმმართველობის დონეზე კოალიციები აქვს და ამით „პოლიტიკურ ერთ ოჯახში“ არიან, ხოლო „ლელოს“ წევრები არიან „ნაციანლური მოძრაობის“ ლიდერები.
„ამიტომ, ეს მთლიანი მიმიკრია არის იმის მცდელობა, რომ ბრენდი „ნაციონალური მოძრაობა, რაღაცნაირად, ქართველების თვალს მოაცილონ და აჩვენონ, თითქოს რაღაც სხვა ძალა არის. ზუსტად იგივე ხუთიანი აწერია შუბლზე ყველას, გახარიასაც, ხაზარაძესაც, მელიასაც, ვაშაძე იქნება, თუ სხვა ამ პარტიის წარმომადგენელი“-განაცხადა პაპუაშვილმა.
