ლატვიის, ლიეტუვისა და ესტონეთის საგარეო საქმეთა მინისტრებმა განაცხადეს, რომ უკრაინასთან ერთად ბოიკოტს გამოუცხადებენ სკოპიეში ეუთოს მინისტერიალს რუსეთის საგარეო საქმეთა მინისტრის სერგეი ლავროვის დასწრების გამო.
„რუსეთის ფედერაციის აგრესიული ომი და სისასტიკე სუვერენული და მშვიდობიანი მეზობელი უკრაინის წინააღმდეგ უხეშად არღვევს საერთაშორისო კანონმდებლობას, მათ შორის გაეროს წესდებას და წარმოადგენს თავდასხმას ეუთო-ზე და მის ფუნდამენტურ პრინციპებზე“, - ნათქვამია ბალტიის ქვეყნების საგარეო საქმეთა მინისტრების ერთობლივ განცხადებაში.
მინისტრების განცხადებით, მინისტერიალზე ლავროვის დასწრება ქმნის რუსეთის, როგორც თავისუფალი ერების საზოგადოების წევრის ლეგიტიმაციის, რუსეთის მიერ ჩადენილი სასტიკი დანაშაულების მასშტაბის შემცირების, რუსეთის მიერ ეუთოს ფუნდამენტური პრინციპებისა და ვალდებულებების აშკარა დარღვევისა და უპატივცემულობისადმი შეგუების რისკს.
„ჩვენ, ესტონეთის, ლატვიისა და ლიეტუვის მინისტრები, ამის ნაწილი არ ვიქნებით და არ გავიზიარებთ პასუხისმგებლობას ამის შედეგებზე“, – აღნიშნულია განცხადებაში.
განცხადებაში ნათქვამია, რომ ეუთო თავდაპირველად შეიქმნა ევროპის უსაფრთხოებისთვის, კონფლიქტების თავიდან აცილებისა და მშვიდობის შენარჩუნებისთვის, ხოლო რუსეთმა თავისი უკანონო და სასტიკი ქმედებებით არაერთხელ დაამტკიცა, რომ არ არის პარტნიორი ევროპის უსაფრთხოების სფეროში.
ჩრდილოეთ მაკედონიამ, რომელიც ეუთო-ს თავმჯდომარეა, გასულ კვირას ლავროვი მინისტერიალზე დასასწრებად მიიწვია. ბულგარეთის საგარეო საქმეთა სამინისტრომ განაცხადა, რომ ლავროვის თვითმფრინავს თავისი საჰაერო სივრცის გადაკვეთის ნებართვას მისცემს.
ბალტიის ქვეყნების საგარეო საქმეთა მინისტრები თავიანთ განცხადებაში აღნიშნავენ, რომ რუსეთის აგრესია დაუყოვნებლივ უნდა შეწყდეს, მან უნდა გაიყვანოს თავისი ძალები უკრაინის მთელი ტერიტორიიდან, აანაზღაუროს მიყენებული ზიანი და პასუხი აგოს ჩადენილ დანაშაულებზე.
