ხვალ, 25 ნოემბერს თბილისში გაიხსნება ისრაელელი მხატვრების ჯგუფური გამოფენა, რომელიც მშვიდობას ეძღვნება.
"სამართლიანობა, სიმართლე და მშვიდობა?" ასე ჰქვია გამოფენას, რომელიც თბილისში მიმდინარეობდა და ისრაელზე 7 ოქტომბერს ტერორისტების თავდასხმის შემდეგ განვითარებული მოვლენების გამო შეწყდა.
გამოფენა განიხილავს მშვიდობის შესაძლებლობას და კითხვის ნიშნის ქვეშ აყენებს იმ სამი საყრდენის სტაბილურობას, რომელზეც მსოფლიო დგას - სამყაროს გამოსწორების, უსაფრთხო სივრცის პოვნისა და ნორმალურ ცხოვრებას დაბრუნების იმედი.
გამოფენაში მონაწილე KakdelArt საზოგადოების 8 მულტიდისციპლინური მხატვრები არიან ოლიმ ხადაშიმი (ახალი რეპატრიანტები), რომლებიც უკვე ისრაელში ცხოვრობენ და შვილების უსაფრთხოების გამო მოუწიათ ქვეყნის დატოვება. ისინი მიიწვიეს თბილისში, Sisters Room-ის სამხატვრო რეზიდენციაში, სადაც ერთად მუშაობდნენ სპეციალურად გამოფენისთვის ნამუშევრების შესაქმნელად.
გამოფენა 25 ოქტომბერს, 19:00 საათზე, Sisters Room - Artist Run Space-ში (ჩუბინაშვილის 21) გაიხსნება. 20:00 საათზე ქართველი მომღერალი ქრისტი ჯაფარიძე ებრაულად იმღერებს სამართლიანობის, ჭეშმარიტებისა და მშვიდობისადმი მიძღვნილ სიმღერას.
ექსპოზიციის დათვალიერება 2 დეკემბრამდე იქნება შესაძლებელი, 17:00-21:00 საათებში, სამშაბათიდან შაბათის ჩათვლით.
მონაწილე მხატვრები: ანასტასია ბუკალოვა, ქსენია გორშკოვა, მაშა შპრაიზერი, მაშა ნევეროვა, ლიბი ზაკი, მაშა ბრუმბერგი, ელენა შტემბერგი, ალექსანდრე ჟერდევი.
კურატორები: დაშა ილიაშენკო, ოლგა ელისეევა.
პარტნიორები: KakdelArt პლატფორმა მხატვრებისთვის, Sisters Room artist run space, Israeli House NET, Dor L'Dor Georgia.
KakdelArt არის არტისტების ინტეგრაციის პლატფორმა, მხატვრების ფართო და ინოვაციური საზოგადოება ისრაელში და მთელ მსოფლიოში. ის დააარსა და მართავს დაშა ილიაშენკო.
Sisters Room ხელოვნების სივრცე შექმნილია კულტურისა და ხელოვნების პოპულარიზაციისთვის ინსტიტუციური ჩარჩოს, ენისა და კულტურული ბარიერების მიღმა კომუნიკაციისთვის და ახალგაზრდა ხელოვანების, კურატორებისა და ხელოვნების მოყვარულთა მხარდასაჭერად. მისი კურატორი ოლია მიანნიკი (ელისეევა).
ეს არის მოხალისეობრივი და არაკომერციული პროექტი, რომელიც მიზნად ისახავს მხარი დაუჭიროს ისრაელის ხელოვანებს და თარგმნოს ისრაელის პოზიცია და გრძნობები მთელ მსოფლიოში ხელოვნებისა და პირადი ისტორიების საშუალებით. გამოფენა მოიცავს ქანდაკებებს, გრაფიკას, ანიმაციას, ინსტალაციას და ტექსტურ ნამუშევრებს.
გამოფენის პარტნიორია „ისრაელის სახლი“, რომლის ხელმძღვანელის, იციკ მოშეს თქმით, მნიშვნელოვანი მოვლენაა 7 ოქტომბრის ტრაგედიის შემდეგ ხელოვანების მიერ ისრაელს გარეთ ასეთი ღონისძიების გამართვა. „7-მა ოქტომბერმა ისრაელში შეცვალა ბევრი ხედვა. მჯერა, ეს აისახება საგარეო ურთიერთობებზეც. ჩვენ მსოფლიოს სხვადასხვა ენაზე, მათ შორის სახალხო თუ დიპლომატიის ენაზე უნდა ვუთხრათ სიმართლე იმ ტერორზე, რომელიც ისრაელის წინააღმდეგ მიმდინარეობს. სიმბოლურია, რომ ეს გამოფენა საქართველოში ტარდება, მეგობარ ქვეყანაში, რომელიც ისრაელის სოლიდარულია“, _ აცხადებს იციკ მოშე.
