სავარაუდოდ, ჩინური მხარისთვისაც გასაგებია ის, რომ სალომე ზურაბიშვილი არ წარმოადგენს ქვეყნის გამხმოვანებელს, ის არის ფორმალური პრეზიდენტი. ის ერთმანეთისგან ვერ ასხვავებს კერძო, პირად მოსაზრებებსა და ქვეყნის ოფიციალური პირის, ქვეყნის პრეზიდენტის ოფიციალურ პოზიციას, - იურიდიულ საკითხთა კომიტეტის თავმჯდომარის პირველმა მოადგილემ, დავით მათიკაშვილმა განაცხადა.
მან კომენტარი გააკეთა სალომე ზურაბიშვილის განცხადებაზე, რუსეთის პრეზიდენტ ვლადიმირ პუტინისა და ჩინეთის ლიდერ, სი ძინპინის შესახებ.
„კითხვაზე, თუ რატომ არ ენდობიან სალომე ზურაბიშვილს, საგარეო პოლიტიკის წარმართოს, თავად გასცა დამაჯერებლად სრულყოფილი პასუხი, როდესაც საფრთხის ქვეშ ჩააგდო საქართველოსა და ჩინეთს შორის არსებული სტრატეგიული ურთიერთობა. თქვენ ხომ წარმოგიდგენიათ, სალომე ზურაბიშვილი რეალურად საგარეო პოლიტიკის წარმმართველი რომ იყოს, რა მდგომარეობაში იქნებოდა დღეს საქართველო-ჩინეთის ურთიერთობა. სავარაუდოდ, ჩინური მხარისთვისაც გასაგებია ის, რომ სალომე ზურაბიშვილი არ წარმოადგენს ქვეყნის გამხმოვანებელს, ის არის ფორმალური პრეზიდენტი. ის ერთმანეთისგან ვერ ასხვავებს კერძო, პირად მოსაზრებებსა და ქვეყნის ოფიციალური პირის, ქვეყნის პრეზიდენტის ოფიციალურ პოზიციას, რომელმაც ქვეყნის პოზიცია უნდა გაჟღეროს“, - განაცხადა მათიკაშვილმა.
საქართველოს პრეზიდენტმა „LCI-თან“ მიცემულ ინტერვიუში საუბრისას, ჟურნალისტის კითხვაზე, იმედოვნებს თუ არა, რომ პუტინი და სი ძინპინი ოდესმე გასამართლდებიან, განაცხადა: „მე ჩემი შინაგანი რწმენით ვფიქრობ, რომ ეს იქნებოდა ისტორიული შედეგი, რაც გარკვეულ საკითხებს თავის ადგილს მიუჩენდა. თუ მეკითხებით, ვფიქრობ, რომ ეს რეალისტურია? არა. რადგან ჩვენ რეალისტურ სამყაროში ვცხოვრობთ, სადაც ეს არ ხდება, არ ვართ ალისას საოცრებათა სამყაროში“, - აღნიშნა პრეზიდენტმა.
