ბრიტანეთის შინაგან საქმეთა მინისტრმა სუელა ბრავერმანმა ლონდონის პოლიცია სხვა საპროტესტო ჯგუფებთან შედარებით პროპალესტინური და ანტიისრაელური მიტინგების მიმართ ლმობიერ დამოკიდებულებაში დაადანაშაულა.
პროპალესტინური დემონსტრაციები, რომელსაც ხშირად თან ახლავს მკაცრი ანტიისრაელური რიტორიკა, ყოველ შაბათ-კვირას იმართება ლონდონსა და ბრიტანეთის სხვა ქალაქებში, ისრაელი-ჰამასის ომის დაწყების შემდეგ.
ბრევერმანმა თქვა, რომ ლონდონის პოლიცია უგულებელყოფს პროპალესტინურად განყობილი ხალხის მხრიდან კანონის დარღვევას და მათ მიერ გამართულ დემონსტრაციებს "სიძულვილის მარშები" უწოდა.
მაგალითისთვის მოყვანილია დემონსტრანტებს შორის პოპულარული სლოგანი „მდინარედან ზღვამდე, პალესტინა იქნება თავისუფალი“, რაც ბევრის მიერ აღიქმება, როგორც ისრაელის სახელმწიფოს განადგურების მოწოდება, რაც დაჯგუფება „ჰამასის“ მიზანია.
ლონდონის პოლიცია, თავის მართლების მიზნით ამბობს, რომ ხელისუფლებისგან მეტი სიცხადე უნდა, თუ რას წარმოადგენს ექსტრემიზმი და სად გადის ზღვარი აზრის გამოხატვის კანონიერი უფლების გამოყენებასა და სიძულვილის გაღვივებას შორის.
მანამდე დიდი ბრიტანეთის პრემიერ-მინისტრის რეზიდენციამ გააკრიტიკა ორგანიზატორების გადაწყვეტილება 11 ნოემბერს პალესტინელების მხარდასაჭერად მორიგი მსვლელობის გამართვის შესახებ.
ამ დღეს, ქვეყანა ყოველწლიურად აღნიშნავს ზავის დღეს - პირველი მსოფლიო ომის დასრულებასთან დაკავშირებით.
პრემიერ-მინისტრმა რიში სუნაკმა დაგმო დაგეგმილი საპროტესტო აქციები, მას "პროვოკაციული და უპატივცემულო" უწოდა, თუმცა აღნიშნა, რომ მთავრობა მხარს უჭერს "მშვიდობიანი პროტესტის უფლებას".
