პარტია „საქართველოსთვის“ ინფორმაციით, უახლოეს მომავალში „ქართული ოცნება“ მორიგ გაყალბებულ კვლევას და მისთვის სასარგებლო შედეგებს გამოაქვეყნებს.
როგორც პარტიაში აცხადებენ, ბოლო პერიოდის უწყვეტი პროპაგანდა გიორგი გახარიას და სხვა პოლიტიკური პარტიების თუ პერსონების არარსებული ალიანსების შესახებ, სწორედ ამ მიზანს ემსახურება. ეს კი 2024 წლის არჩევნების გაყალბებისთვის მზადების ნაწილია იმ შეზღუდვებთან ერთად, რომელსაც მართველი პარტია საკანონმდებლო დონეზე ახორციელებს, როდესაც დაუსაბუთებლად ამკაცრებს შეკრებებისა და მანიფესტაციების შესახებ, ასევე მაუწყებლობის შესახებ კანონებს.
საქართველოს პარლამენტის დეპუტატის, პარტია „საქართველოსთვის“ წევრის, ანა ბუჩუკურის განცხადებით, „ქართული ოცნება“ უახლოეს მომავლი პარტიული ფეიკ-რეიტინგების გამოქვეყნებას გეგმავს.
„გვაქვს ინფორმაცია, რომ „ოცნება“ უახლოეს მომავალში გამოაქვეყნებს პარტიულ ფეიკ-რეიტინგებს! ვიცით, რომ სხვა პოლიტიკური აქტორებიც ემზადებიან საკუთარი კვლევების გამოსაქვეყნებლად. კობახიძის და “ოცნების” მიერ შემოთავაზებული კომბინაციები, გიორგი გახარიას ხან ვისთან და ხან ვისთან გაერთიანების შესახებ, ემსახურება მხოლოდ იმას, რომ „ოცნება“ ცდილობს, საკუთარი ამომრჩეველის დარწმუნებას იმაში, რომ რეიტინგი მხოლოდ მას და ნაცმოძრაობას აქვს, რაც, რა თქმა უნდა, ტყუილია და ამას არჩევნების ნამდვილი შედეგები დაადასტურებს!“ - განაცხადა ანა ბუჩუკურმა.
