„ქართული ოცნების“ უსაფუძვლო ბრალდება, რომ თითქოს ოპოზიცია ახდენს ევროკავშირის კანდიდატი ქვეყნის სტატუსის მიღების საბოტაჟს, რუსული პროპაგანდისთვის დამახასიათებელი ცინიზმია, - ამის შესახებ განაცხადა „ერთიანი ნაციონალური მოძრაობის“ საგარეო ურთიერთობების მდივანმა, ზურაბ ჭიაბერაშვილმა.
ზურაბ ჭიაბერაშვილი გამოეხმაურა „ქართული ოცნების“ თავმჯდომარის ირაკლი კობახიძის განცხადებას, რომელიც მან თქვა: „რაც შეეხება კონკრეტულად სამნიძის განცხადებას, მე მაქვს ინფორმაცია, რომ ის გულისხმობდა კონკრეტულ სუბიექტებს, კერძოდ ეს არის პარტია „ნაცმოძრაობა“, ეს არის „ლელო“ და ეს არის გვარამია, ამ სამ სუბიექტზე ჰქონდა მას ინფორმაცია. თუმცა, დეტალებს არ აკონკრეტებს, მაგრამ ზუსტად ვიცით ჩვენ, რომ ეს სუბიექტები დადიოდნენ ევროპაში და არამარტო ევროპაში, ისინი ლობირებდნენ კანდიდატის სტატუსის წინააღმდეგ. რასაც ვამტკიცებდით ამდენი ხნის განმავლობაში, ის პრაქტიკულად დაადასტურა თავად ოპოზიციის წარმომადგენელმა სამნიძემ“.
ზურაბ ჭიაბერაშვილის თქმით, „ერთიანი ნაციონალური მოძრაობა“ მხარს უჭერს ევროკავშირის კანდიდატი ქვეყნის სტატუსის მიღებას და მოუწოდებს პროდასავლურ ოპოზიციურ პარტიებს ამ საქმეში ერთიანი და კოორდინირებული მოქმედებისაკენ.
„ევროკავშირში გაწევრიანება ქართველი ხალხის არჩევანია. „ერთიანი ნაციონალური მოძრაობის“ მიერ ვარდების რევოლუციის შემდგომ ჩატარებულმა რეფორმებმა მყარი ნიადაგი შექმნა ამ მიზნის განსახორციელებლად.
დღეს ამ გზაზე ევროკავშირის კანდიდატი ქვეყნის სტატუსის მიღება უმნიშვნელოვანესი ნაბიჯია. ამჯერადაც, „ერთიანი ნაციონალური მოძრაობა“ მხარს უჭერს სტატუსის მიღებას და საერთაშორისო პარტნიორებთან თავის კომუნიკაციაში ყოველთვის ხაზს უსვამს, რეგიონში გაზრდილი საფრთხეების გათვალისწინებით, სტატუსის მიღების გეოპოლიტიკურ მნიშვნელობას. ეს გვითქვამს მრავალჯერ და ვიმეორებთ კვლავაც.
ხელისუფლებაში მოსვლის დღიდან „ქართული ოცნება“ ახორციელებს ევროკავშირში გაწევრიანებასთან სრულიად შეუთავსებელ პოლიტიკურ დევნას, რომლის მკაფიო გამოხატულება პრეზიდენტ სააკაშვილის უკანონ და უსამართლო პატიმრობაა. შარშან ევროპული საბჭოს მიერ სტატუსის საკითხზე გადაწყვეტილების მიღებამდე ტელეკომპანია „მთავარის“ დამფუძნებლის, ნიკა გვარამიას უკანონო და უსამართლო დაკავება ქართველო ხალხის ისტორიული არჩევანისათვის ძირის გამოთხრის ცხადი მაგალითია. „ქართულმა ოცნებამ“ ევროკავშირის კანდიდატი ქვეყნის სტატუსის მიღების პერსპექტივას საფრთხე შეუქმნა გაზაფხულზე რუსული კანონის ინიცირებით და შემოდგომაზე პრეზიდენტ ზურაბიშვილის იმპიჩმენტის მცდელობით. საქართველოს მეგობრები მუდმივად წუხან იმაზე, რომ საქართველოს საგარეო-პოლიტიკური პოზიციონირება წინააღმდეგობაშია ევროკავშირის საგარეო პოლიტიკასთან.
ამ ფონზე „ქართული ოცნების“ უსაფუძვლო ბრალდება, რომ თითქოს ოპოზიცია ახდენს ევროკავშირის კანდიდატი ქვეყნის სტატუსის მიღების საბოტაჟს, რუსული პროპაგანდისთვის დამახასიათებელი ცინიზმია. თუ დეკემბერში ევროპული საბჭო მიზანშეუწონლად ჩათვლის, რომ საქართველოსთვის ამ ეტაპზე კანდიდატის სტატუსის მიღება ნაადრევია, ეს სამწუხარო ისტორიული ჩავარდნა მხოლოდ და მხოლოდ „ქართული ოცნების“ მიერ წლობით დანერგილი პოლარიზაციის, პოლიტიკური დევნის, სახელმწიფო ინსტიტუტების ნგრევისა და რუსი ოლიგარქის, ბიძინა ივანიშვილის მიერ სახელმწიფოს მიტაცების შედეგი იქნება.
ამ ფონზე გაუმართლებელია ვინმემ პასუხისმგებლობა ააცილოს „ქართულ ოცნებას“ და განხეთქილება შეიტანოს საერთოსახალხო ძალისხმევაში, რომ ქვეყანამ დეკემბერში ევროკავშირის კანდიდატი ქვეყნის სტატუსი მიიღოს. ეს შეიძლება ზოგიერთ პოლიტიკოსის საარჩევნო ინტერესითაა ნაკარნახევი, მაგრამ უნდა გვესმოდეს, რომ ქვეყნისთვის მნიშვნელოვან მომენტში ასე მოქმედება საერთოეროვნულ ინტერესს აზიანებს.
„ერთიანი ნაციონალური მოძრაობა“ მხარს უჭერს ევროკავშირის კანდიდატი ქვეყნის სტატუსის მიღებას და მოუწოდებს პროდასავლურ ოპოზიციურ პარტიებს ამ საქმეში ერთიანი და კოორდინირებული მოქმედებისაკენ.“ - განაცხადა ზურაბ ჭიაბერაშვილმა
