ოდესის პორტში, რუსული რაკეტით განადგურებული მარცვლეულის საცავის ნანგრევებში 2 ადამიანის ცხედარი იპოვეს. ოდესის საოლქო-სამხედრო ადმინისტრაციის ინფორმაციით, ორივე დაღუპული ამ ობიექტზე მუშაობდა. მათთან კონტაქტი გასულ ღამით, პორტზე მასირებული შეტევის შემდეგ, შეწყდა. ნანგრევებში მოყოლილი ცხედრები შუადღის შემდეგ იპოვეს.
მარცვლეულის საცავის გარდა, მნიშვნელოვნად დაზიანდა ოდესის საზღვაო ნავსადგურის და ამავე ტერიტორიაზე მდებარე სასტუმროს შენობები. განადგურებულია რამდენიმე საწყობიც.
უკრაინის თავდაცვის ძალების მონაცემებით, 25 სექტემბერს ქვეყნის სამხრეთზე შეტევისას რუსეთმა გამოიყენა 19 უპილოტო საფრენი აპარატი და 12 ფრთოსანი რაკეტა. სამხრეთის სარდლობის ცნობით, საჰაერო თავდაცვის ძალებმა გაანადგურეს 19-ვე დრონი და 2 რაკეტა.
