უკრაინის ვიცე-პრემიერი ირინა ვერეშჩუკი უკრაინელებს მოუწოდებს შეძლებისდაგვარად დატოვონ ანექსირებული ყირიმი.
„კიდევ ერთხელ ვთხოვ უკრაინელებს შეძლებისდაგვარად დატოვონ ყირიმი და ნახევარკუნძულის გათავისუფლებას ხელისუფლების მიერ კონტროლირებად ტერიტორიაზე ან სხვა ქვეყანაში დაელოდონ“, - განაცხადა ვერეშჩუკმა.
აგვისტოში ვერეშჩუკმა განაცხადა, რომ ომი დიდხანს გაგრძელდება და მომავალ გაზაფხულზეც არ დამთავრდება.
ბოლო პერიოდში ანექსირებულ ყირიმში თავდასხმები გახშირდა. 22 სექტემბერს ცნობილი გახდა სევასტოპოლში შავი ზღვის ფლოტის შტაბბინაზე მომხდარი თავდასხმის შესახებ. საერთაშორისო მედიის ცნობით, უკრაინამ იერიშის დროს Storm Shadow-ის ტიპის რაკეტები გამოიყენა.
უკრაინის დაზვერვის მთავარი სამმართველოს ხელმძღვანელმა კირილო ბუდანოვმა განაცხადა, რომ რუსეთის შავი ზღვის ფლოტის შტაბბინაზე თავდასხმის შედეგად დაიღუპა სულ მცირე 9 ადამიანი, 16 კი დაიჭრა, მათ შორის არიან რუსი გენერლები.
