შსს აკადემიაში საქართველოს სახალხო დამცველთან არსებულ ეროვნულ უმცირესობათა საბჭოსა და შსს-ის წარმომადგენლებს შორის შეხვედრა გაიმართა. აღნიშნული ვიზიტი საქართველოს შინაგან საქმეთა სამინისტროსა და სახალხო დამცველის აპარატს შორის დადებული მემორანდუმის ფარგლებში განხორციელდა.
მემორანდუმს შსს და სახალხო დამცველის აპარატს შორის 2010 წლის 4 თებერვალს მოეწერა ხელი. იგი ეფუძნება 2009 წლის 8 მაისს საქართველოს მთავრობის განკარგულებით დამტკიცებულ შემწყნარებლობისა და სამოქალაქო ინტეგრაციის ეროვნულ კონცეფციასა და სამოქმედო გეგმას.
მხარეებმა ისაუბრეს სამოქალაქო ინტეგრაციის კუთხით შსს-ში მიმდინარე საქმიანობების შესახებ და შეთანხმდნენ ამ კუთხით ერთობლივ სამომავლო გეგმებზე.
აღსანიშნავია, რომ საქართველოს სახალხო დამცველის მსგავსი ვიზიტი შსს აკადემიაში 2010 წლის 11 თებერვალს გაიმართა. სახალხო დამცველმა წაიკითხა მიმოხილვითი ლექციები შსს აკადემიის უბნის ინსპექტორთა და საპატრულო პოლიციის საბაზისო კურსის მსმენელებისთვის ეროვნული უმცირესობების თემაზე, შეხვდა ეროვნული უმცირესობის წარმომადგენელ მოქმედ და მომავალ პოლიციელებს, რომლებიც შსს აკადემიის ქართული ენის შემსწავლელ ცენტრში გადიან შესაბამის სწავლებას.
აღნიშნული ვიზიტების პერიოდულად განხორციელება მომავალშიც იგეგმება.
