მომავალი არჩევნების ჩატარებაზეა დამოკიდებული, დარჩება თუ არა საქართველო დემოკრატიულობის კუთხით მესამეხარისხოვანი ქვეყნების სიაში. ამის შესახებ ფრაქცია "ქრისტიან-დემოკრატების" წევრმა ლევან ვეფხვაძემ 2010 წლის დემოკრატიის ინდექსში საქართველოს 103-ე ადგილზე გასვლის შეფასებისას აღნიშნა.
"პოტსაბჭოთა სივრცეში საქართველო მართლაც წინ არის სხვა ქვეყნებთან შედარებით, მაგრამ ჩვენ გვაქვს სხვა მიზნები და მისწრაფებები, რომელიც ევროატლანტიკურ ოჯახში შესვლას უკავშირდება. ბუნებრივია, ამ ოჯახში გაწევრიანებასთან დაკავშირებით პრობლემა ჩვენი მეზობლის გამო გვაქვს, ფაქტია, რომ ჯერ თვითონ არ ვართ მზად, რადგან ჩვენი ქვეყნის მართვის სტილი ევროპულ სტანდარტებთან ახლოსაც კი არ არის", - დასძინა ვეფხვაძემ.
"ქრისტიან-დემოკრატებს" მიაჩნიათ, რომ დემოკრატიულობის კუთხით ბევრი რამ არის გასაკეთებელი და რაც არ უნდა დემოკრატიული სისტემები ჩამოყალიბდეს, თუ ეს ცხოვრებაში არ გადავა, არაფერი შეიცვლება.
"დემოკრატიული განვითარებისთვის მომავალ არჩევნებს დიდი მნიშვნელობა აქვს, რადგან მასზეა ჩვენი ქვეყნის ბედი დამოკიდებული, დავრჩებით მესამეხარისხოვანი ქვეყნების რიგში, თუ წინ წავიწევთ", - აღნიშნა დეპუტატმა.
