"კავკასიის ინტერნეტ მედია ჯგუფის" გენერალური დირექტორის, გიორგი კაპანაძის მტკიცებით, ის presa.ge -ს სარედაქციო პოლიტიკაში არასდროს ჩარეულა.
"ჩემი მისვლით პრესა.გე-ში სარედაქციო პოლიტიკა არ შეცვლილა. არ ყოფილა არც ერთი შემთხვევა, როცა საიტის ჟურნალისტებისთვის რაიმე ტიპის სარედაქციო დავალება მიმეცა, ან მათი რომელიმე სტატია და მასალა დამებლოკა. ეს ჩემი ინტერესის სფერო არ არის. მე გენერალური დირექტორი ვარ და სხვა ტექნიკური ხასიათის საქმეები მაქვს", - განუცხადა კაპანაძემ "ჯი-ეიჩ-ენს" presa.ge -დან წასული ჟურნალისტების განცხადებაზე კომენტირებისას.
კაპანაძე იმასაც აკონკრეტებს, რომ presa.ge მხოლოდ რამდენიმე ჟურნალისტმა დატოვა და არა მთლიანმა შემადგენლობამ.
"საიტი ჩვეულებრივ რეჟიმში აგრძელებს მუშაობას. გვერდზე სტატიები ინტენსიურად იდება", - დასძენს ჰოლდინგის გენდირექტორი.
შეგახსენებთ, რომ presa.ge -ს ყველა ჟურნალისტთა პროტესტის ნიშნად სამსახური დატოვა. როგორც ისინი აცხადებენ, კაპანაძემ ჰოლდინგის ხელმძღვანელად დანიშვნის შემდეგ presa.ge -სა და ITV -ის მიმართულები შეცვალა და ის REAL-TV-ის დაამსგავსა, სადაც კაპანაძე პრესის მიმომხილველად მუშაობდა.
აღსანიშნავია, რომ presa.ge -დან წასულმა კორესპონდენტებმა უკვე შექმნეს ახალი ვებგვერდი, რომელზედაც თავიანთ მასალას განათავსებენ. საიტის მისამართია presa.ge.tv.
შეგახსენებთ, რომ პრესა.გე 2007 წელს დაფუძდა, 2008 წელს კი საიტი "კავკასუს ონლაინის" მედიაჯგუფის შემადგენლობაში შევიდა, თუმცა დამფუძნებლებსა და "კავკასუსს" შორის არანაირი იურიდიული დოკუმენტი არ გაფორმებულა და მათ შორის მხოლოდ სიტყვიერი შეთანხმება მოხდა. სწორედ ამიტომ, მას შემდეგ, რაც სანადირაძეს "კავკასუსის" წილის მხოლოდ 30% დარჩა, ჰოლდინგის დირექტორად გიორგი კაპანაძე გადაიყვანეს, რასაც მედიაჯგუფი კატეგორიულად ეწინააღმდეგებოდა.