საპარლამენტო უმრავლესობის წევრი მამუკა მდინარაძე გურიაში, სტიქიის ადგილზე ჩავიდა.
როგორც მდინარაძემ ჟურნალისტებს განუცხადა, ადგილზე მობილიზებულია სამაშველო სამსახური, მძიმე ტექნიკა და სახელმწიფო ყველაფერს აკეთებს მოსახლეობის დასახმარებლად.
„ვითარება საკმაოდ მძიმეა. როგორც ადგილობრივები ჰყვებიან, ამ რაოდენობის ნალექი მათ არ ახსოვთ. მთელი ღამის განმავლობაში იყო კოკისპირული წვიმა, რამაც, როგორც ჩანს, მეწყრული ზონები გააქტიურა. მაგალითად, ჩოჩხათის თემში, ექვსივე სოფელში რამდენიმე ადგილას არის მეწყერი ჩამოწოლილი. ჩოჩხათის თემში ახლაც ეძებენ მოზარდს, რომელიც სახლის გვერდით მდებარე ნაგებობაში იმყოფებოდა. თანავუგრძნობ დაღუპულთა ოჯახებს. სახელმწიფო ყველაფერს აკეთებს, თუკი რაიმე შეიძლება, გაკეთდეს. უამრავ ადგილზეა ხიდები დაზიანებული, ყველგან მიმდინარეობს სამუშაოები, მობილიზებულია მძიმე ტექნიკა მაქსიმალური რაოდენობით. მაშველები იმყოფებიან ყველა ლოკაციაზე. ყველას დაეხმარნენ, ვისაც დახმარება ესაჭიროებოდათ, მაგრამ დამატებით თუ რაიმე საჭიროება იქნება, მზად არიან დახმარებისათვის“, – განაცხადა მამუკა მდინარაძემ.
მისი თქმით, ამ წუთას არ არსებობს ადამიანი, რომელსაც რაღაც საფრთხე აქვს და არ ეხმარებიან.
„ხდება რისკების შეფასება, სადაც მეტი რისკია, პირველ რიგში, მეხანძრე-მაშველი მიდის იქ. ამ წუთას არ არსებობს ადამიანი, რომელსაც რაღაც საფრთხე აქვს და არ ეხმარებიან. ბუნებრივია, შედარებით ნაკლები საფრთხე სადაცაა, მყისიერი საფრთხე არ არის, იქ შესაძლოა, ოდნავ დაგვიანებით მივიდეს. მაგალითად, ვისაც უბრალოდ დატბორილი აქვს პირველი სართული და წყლის ამოტუმბვა გახდეს საჭირო. ბუნებრივია, ეს ოდნავ მოგვიანებით იქნება. პირველ რიგში, მაშველები და უწყებები, მისი წარმომადგენლები მიდიან იქ, სადაც საფრთხე არის მყისიერი. ამასთან დაკავშირებით დამატებით გეოლოგებიც მუშაობენ. იმხელა ნალექი მოვიდა, რომ მიძინებული მეწყრული ზონები გაააქტიურა, რაზეც ცალკე შეფასებას აკეთებენ. ამან გამოიწვია უდიდესი ტრაგედია. ყველა სამუშაოს წევენ იმისათვის, რომ რისკები გამოირიცხოს. პირველ რიგში, იმ ადამიანებთან მიდიან, რომლებსაც მყისიერი დახმარება სჭირდებათ“, – აღნიშნა მამუკა მდინარაძემ.
