როგორც ჩანს, ის იყო ერთ-ერთი მაყურებელი და ჯგუფის ერთ-ერთმა წევრმა მოიხმო სცენაზე, არ ვიცი, აქ რა შეიძლება, გაკეთდეს, იყო ასეთი შემთხვევა ბოლო საპარლამენტო არჩევნების დროს, როდესაც „ნაცმოძრაობის“, ვითომ მთავარი ანტირუსული პარტიის, მთავარ თავყრილობაზე, თავისუფლების მოედანზე რუსულ ენაზე შესრულდა „თბილისო“ და მაშინ არავინ აღელვებულა, – ამის შესახებ „ქართული ოცნების“ თავმჯდომარემ, ირაკლი კობახიძემ The Killers-ის კონცერტზე მომხდარ ინციდენტზე საუბრისას განაცხადა.
კობახიძის თქმით, „როდესაც „ნაცმოძრაობის“ მთავარ აქციაზე რუსულად ჟღერდება „თბილისო“ და ამაზე არცერთი ადამიანი არ ღელავს, სხვა შემთხვევაში ასეთი აღელვებები არის ხელოვნური“.
„დღეს, როდესაც ვხედავთ ასეთ აღელვებას, აქ არის ხელოვნურობის ნიშნები. ასევე, იცით, რომ ელენე ხოშტარია, პრაქტიკულად, ყოველთვიურ რეჟიმში იღებს რუსულ რუბლს რუსული ბიუჯეტიდან, ამაზეც არავინ ღელავს. გიორგი ვაშაძე აქირავებს რუს მდგმურზე თავის ბინას, აქირავებდა, აქირავებს, არ ვიცი, ყოველ შემთხვევაში, აქირავებდა, ამაზეც არავინ ღელავს. ამიტომ, მგონია, მაქვს უფლება, მჯეროდეს, რომ ასეთი აღელვებები არის ხელოვნური. შეიძლება, იქ ბევრი ადამიანი გულწრფელად აღელდა, გასაგებია, ბუნებრივია, რუსეთს აქვს ოკუპირებული ჩვენი ტერიტორიების 20% და მე, რა თქმა უნდა, პატივს ვცემ იმ ადამიანებს, ვისაც გულწრფელი აღელვება ჰქონდათ, მაგრამ მგონია, რომ ხშირ შემთხვევაში ასეთი აღელვება არის ხელოვნური და ამ რწმენას მაძლევს წარსული შემთხვევები. როდესაც „ნაცმოძრაობის“ მთავარ აქციაზე, კიდევ ერთხელ გავიმეორებ, რუსულად ჟღერდება „თბილისო“ და ამაზე არცერთი ადამიანი არ ღელავს, მგონია, რომ სხვა შემთხვევაში ასეთი აღელვებები არის ხელოვნური“, – განაცხადა კობახიძემ.
