საგანგებო სიტუაციების მართვის სამსახურის უფროსმა, თემურ მღებრიშვილმა ჟურნალისტებთან დეტალურად ისაუბრა რაჭაში მომხდარი სტიქიის შედეგების აღმოფხვრისთვის მიმდინარე სამუშაოებისა და განვითარებული მოვლენების შესახებ.
„მსურს, საზოგადოებას მივაწოდო შემაჯამებელი ინფორმაცია შსს-ს კომპეტენციის ფარგლებში, როგორც მიმდინარე საკითხებზე, საძიებო სამუშაოებზე, ასევე რა ხდებოდა ქრონოლოგიურად, პირველივე წუთიდან, 112-ში შემოსული პირველი შეტყობინების შემდეგ. როგორც იცით, 3 აგვისტოს 15 საათსა და 10 წუთზე დაფიქსირდა ზარი 112-ში, რომელიც გადმომისამართდა, როგორც წესი, საგანგებო სიტუაციების მართვის სამსახურის ცენტრში. ინფორმაცია იყო შოვში მეწყერში მოყოლილი ადამიანების შესახებ. დაუყოვნებლივ მიღებულ იქნა გადაწყვეტილება როგორც ცოცხალი ძალის მობილიზების, ასევე სწრაფი რეაგირების ჯგუფების დაკომპლექტების და ავიაციის მობილიზების და მომზადების. ავიაციას როცა ვგულისხმობ, აქ არის საუბარი როგორც თბილისში დისლოცირებულ ვერტმფრენებზე, აგრეთვე ქუთაისში, კოპიტნარის აეროპორტში მობილიზებულ ვერტმფრენზე. პარალელურ რეჟიმში ინფორმაცია მიღებულ იქნა იმერეთის, რაჭა-ლეჩხუმის, ქვემო სვანეთის პოლიციის დეპარტამენტში და პოლიციის თანამშრომლები შემთხვევის ადგილისკენ გამოემართნენ.
როგორც თბილისიდან, ასევე ქუთაისიდან მობილიზდა ვერტმფრენები. მეტეოროლოგიური პირობების გამო ქუთაისში განსაკუთრებულ სიტუაციებზე სწრაფ მორეაგირე ჯგუფთან ერთად მობილიზებული ვერტმფრენი ვერ ჩაერთო. სამაშველო ღონისძიებაში თბილისიდან გაემგზავრა სასაზღვრო პოლიციის ორი ვერტმფრენი. სამ საათზე ნაკლებ დროში პირველი ვერტმფრენი უკვე სტიქიის ზონაში სამაშველო ღონისძიებაში იღებდა მონაწილეობას. სტიქიის ზონაში გაემგზავრა შინაგან საქმეთა მინისტრის მოვალეობის შემსრულებელი და მინისტრის მოადგილე, შემთხვევის ადგილზე გავემგზავრეთ საგანგებო სიტუაციების მართვის სამსახურის ხელმძღვანელი პირები. სამაშველო ღონისძიებებში ჩართული ვერტმფრენი სტიქიის ზონაში, „სანსეტ შოვის“ მიმდებარე მოედანზე საკმაოდ რთულ მეტეოროლოგიურ პირობებში დაფრინდა და უშუალოდ დამეწყრილ ტერიტორიაზე მოყოლილი 70 ადამიანის ევაკუაცია განახორციელა“, – აღნიშნა თემურ მღებრიშვილმა.
როგორც თემურ მღებრიშვილმა განაცხადა, სტიქიის პირველივე ღამეს, მთელი ღამის განმავლობაში მუშაობდა სითბური დრონები, ხოლო სამძებრო ღონისძიებებში ავიაციის ჩართულობა, რელიეფიდან და სტიქიის არეალში განლაგებული საკომუნიკაციო ანძების გათვალისწინებით, უსაფრთხოების ზომებიდან გამომდინარე შეუძლებელი იყო.
„ვერტმფრენისა და სითბური დრონების საშუალებით დათვალიერდა სტიქიის ზონის მიმდებარე პერიმეტრი, პარალელურად, პოლიციის თანამშრომლებისა და მეხანძრე-მაშველების მიერ შეირჩა უსაფრთხო ადგილები, სადაც დამეწყრილი ტერიტორიებიდან ხდებოდა მოქალაქეების გამოყვანა და მობილიზება. ამავდროულად, ონის მუნიციპალიტეტის მერიაში გაიმართა საგანგებო თათბირი, შეიქმნა საკოორდინაციო შტაბი და ამოქმედდა დამატებით ცხელი ხაზი, დაკარგული პირების შესახებ ინფორმაციის დაფიქსირების მიზნით. აქვე, კიდევ ერთხელ მინდა, განვმარტო, რომ ღამის განმავლობაში მუშაობდა სითბური დრონები, ხოლო სამძებრო ღონისძიებებში ავიაციის ჩართულობა, რელიეფიდან და სტიქიის არეალში განლაგებული საკომუნიკაციო ანძების გათვალისწინებით, უსაფრთხოების ზომებიდან გამომდინარე შეუძლებელი იყო“, – განაცხადა თემურ მღებრიშვილმა.
