საქართველოს პრეზიდენტმა მიხეილ სააკაშვილმა სვანეთში 25 წლის ალპინისტ კარლო ხერგიანის გარდაცვალების ფაქტზე განცხადება გააკეთა. პრეზიდენტის თქმით, მთავრობამ ყველაფერი უნდა იღონოს ასეთი ფაქტების შესამცირებლად.
"პირველი ის არის, რომ მესტიაში რამდენიმე დღის განმავლობაში იყო დაკარგული მთამსვლელი. სამწუხაროდ, მისი ცოცხლად მიკვლევა ვერ მოხერხდა", - განაცხადა პრეზიდენტმა სათაფლიაში გამართულ მთავრობის სხდომაზე.
შეგახსენებთ, რომ რამდენიმე დღის წინ სვანეთში მაშველებმა ზვავში დაკარგულ მთამსვლელს მიაგნეს. 25 წლის კარლო ხერგიანი თოვლის ქვეშ გარდაცვლილი იპოვეს. თეთნულდთან სამძებრო სამუშაოს მაშველები ოთხი დღის განმავლობაში ატარებდნენ. ადგილობრივებთან და ცნობილ მთამსვლელებთან ერთად, ოპერაციაში ჩართული იყო ავიაცია, შინაგან საქმეთა, სასაზღვრო უწყებისა და თავდაცვის სამინისტროს წარმომადგენლები.