20 დეკემბერს, 13:00 საათზე, გალერეა "9"-ის საგამოფენო დარბაზში (გუდიაშვილის 9) წამების მსხვერპლთა რეაბილიტაციის ცენტრი "ემპათია" და "წამების მსხვერპლთა რეაბილიტაციის საერთაშორისო საბჭო" (დანია, კოპენჰაგენი), ევროკავშირის ფინანსური მხარდაჭერით საქველმოქმედო აქციას მართავენ.
ღონისძიების ფარგლებში სპეციალური პრესკონფერენცია ჩატარდება, რომლის დროსაც წარმოდგენილი იქნება ციხეებსა და პოლიციაში წამების, ცემის, არაადამიანური მოპყრობისა და არაადეკვატური სამედიცინო მომსახურების კონკრეტული ფაქტები; ასევე ევროპის საბჭოს წამების პრევენციის ანგარიშში მოყვანილი სავალალო მდგომარეობა, საქართველოს ციხეთა სისტემაში.
"ემპათიას" პრეზიდენტი, მარიამ ჯიშკარიანი, რომელიც ამავდროულად არის მსოფლიო ფსიქიატრთა ასოციაციის სექციის "წამების შედეგები და აღკვეთა" საბჭოს წევრი, ისაუბრებს იმაზე, თუ როგორ ახორციელებს ზეწოლას სასჯელაღსრულების სამინისტრო ცენტრ "ემპათიაზე" და რა დაბრკოლებებს უქმნის ეს უწყება პროექტის - "წამების მსხვერპლთა რეაბილიტაციის სისტემის გაძლიერება საქართველოში" განხორციელებას, საქართველოს ციხეთა სისტემაში; განსაკუთრებით კი არასრულწლოვანთა რეაბილიტაციის მიმართულებით.
ჯიშკარიანი წარმოადგენს კონკრეტულ რეკომენდაციებს, საქართველოში წამების საწინააღმდეგო ახალი სამოქმედო გეგმის შესახებ.
საქველმოქმედო აქციის ფარგლებში წარმოდგენილი იქნება ცენტრ "ემპათიას" ბენეფიციართა - დევნილთა, ყოფილ პატიმართა და პატიმართა, ასევე ქალთა და მოზარდთა თიხის არტნამუშევრების გამოფენა-გაყიდვა. გაყიდვიდან შემოსული თანხა ავტორებს გადაეცემათ.
აქცია იმართება ცნობილ ქართველ მხატვართა და ფოტოხელოვანთა (იური ბერიშვილი, უშანგი ხუმარაშვილი, შალვა მატუაშვილი, მამუკა გიორგაძე, სერგო კენჭაძე, გურამ წიბახაშვილი, იური მეჩითოვი) ნამუშევრების გამოფენასთან ერთად. ამ ნამუშევრების გაყიდვიდან შემოსული თანხის 10% მოხმარდება ეთნოწმენდის მსვერპლი დევნილი მოსახლეობის სამედიცინო მომსახურებას.
ღონისძიებაზე მოწვეულნი არიან არასამთავრობო სექტორის, ხელისუფლების, დიპლომატიური კორპუსის და საერთაშორისო ორგანიზაციების წარმომადგენლები.
