ტურიზმის ეროვნული სააგენტოს ორგანიზებით საქართველოში უკრაინის წამყვანი ჟურნალისტებისა და ტუროპერატორებისგან შემდგარი 16-კაციანი ჯგუფი ჩამოვა. პროქტის განხორციელება მიზნად ისახავს საქართველოს პოპულარიზაციას უკრაინის ტურისტულ ბაზარზე, კერძოდ კი ზამთრის კურორტების პრომოუშენს.
გადამღები ჯგუფი მოამზადებს სიუჯეტს, რომელიც გავა უკრაინის ორ ტელეარხზე იანვრის დასაწყიში ("ტონისი" და მე-5 არხი), მომზადდება სტატიები. იგეგმება ქართველ და უკრაინელ ტუროპერატორთა შეხვედრა.
სტუმრები მოინახულებენ სვანეთს, სადაც გაეცნობიან მესტიას, როგორც ახალ სამთო-სათხილამურო კურორტს, დაათვალიერებენ ახალ საბაგირო გზას, უკვე დასრულებულ აეროპორტს და მესტიის კულტურულ ღირშესანიშნაობებს. ასევე ეწვევიან აჭარას, დაათვალიერებენ განახლებულ ბათუმს და მიიღებენ ინფორმაციას ზამთარში დაგეგმილ სადღესასწაულო ღონისძიებების შესახებ. ტურის ფარგლებში უკრაინელი ჟურნალისტები და ტუროპერატორები ჩავლენ გუდაურში, შემდეგ გაემგზავრებიან კახეთში, სადაც გაეცნობიან ღვინის კულტურასა და ტრადიციებს.
