ჟვანიას სახელობის პედიატრიული საავადმყოფოს, ალადაშვილის საუნივერსიტეტო კლინიკის და სანიკიძის სახელობის ვეტერანთა კლინიკური ჰოსპიტლის რეაბილიტაცია წელსვე დასრულდება.
ამის შესახებ ფინანსთა მინისტრმა კახა ბაუნდურაშვილმა პარლამენტის დღევანდელ სესიაზე 2011 წლის სახელმწიფო ბიუჯეტის წარდგენისას განაცხადა.
მისივე განმარტებით, სამივე აღნიშნული სამედიცინო დაწესებულება ერთად ევროპული სტანდარტების შესაბამის 240 საწოლს შექმნის.
"მიმდინარე მშენებლობებს მომავალ წელს მე-2 სამშობიარო სახლის, ტრავმატოლოგიური კლინიკის და თბილისის მე-2 მრავალპროფილული კლინიკური საავადმყოფოს რეაბილიტაციაც დაემატება, რომლის დასრულების შემდეგაც, სამივე შემთხვევაში ერთად, ასევე თანამედროვე აპარატურით აღჭურვილი 240 საწოლი შეიქმნება", - განმარტა მან.
რაც შეეხება რკინიგზის საავადმყოფოს ტერიტორიაზე განსათავსებელ საავადმყოფოებს, მინისტრის თქმით, 5 კლინიკის რეაბილიტაცია თითქმის დასრულებულია, რაც დამატებით 275 საწოლს ქმნის, დარჩენილი საავადმყოფოების მშენებლობა კი, რომელიც 2011-ში გაგრძელდება, ჯამში 137 საწოლს მოგვცემს.
"ყველა საავადმყოფოს მშენებლობა შეესაბამება დასავლურ სტანდარტებს და ჯამში სახელმწიფო ამაზე 50 მილიონ ლარამდე დახარჯავს", - აღნიშნა ფინანსთა მინისტრმა, რომლის განმარტებითაც, ჰოსპიტალური სექტორის განვითარების პროგრამა საბოლოოდ 2012 წლისთვის დასრულდება.
შეგახსენებთ, რომ საავადმყოფოების რეაბილიტაციის პროგრამაში სახელმწიფოსთან ერთად კერძო სექტორიც მონაწილეობს. რეფორმა საბოლოო ჯამში 46 საავადმყოფოს მშენებლობას ითვალისწინებს.