სვანეთში მაშველებმა ზვავში დაკარგულ მთასვლელს მიაგნეს. 25 წლის კარლო ხერგიანი თოვლის ქვეშ გარდაცვლილი იპოვეს.
მთამსვლელის ცხედარს თეთნულდიდან ჯერ სოფელ მულახში, შემდეგ კი მესტიაში, საკუთარ სახლში გადაასვენებენ. ამის შემდეგ გაირკვევა ექსპერტიზის ჩატარების საკითხი - გაკვეთენ თუ არა გარდაცვლილს.
თეთნულდთან სამძებრო სამუშაოებს მაშველები ოთხი დღის განმავლობაში ატარებდნენ. ადგილობრივებთან და ცნობილ მთამსვლელებთან ერთად, ოპერაციაში ჩართული იყო ავიაცია, შინაგან საქმეთა, სასაზღვრო უწყებისა და თავდაცვის სამინისტროს წარმომადგენლები.
შემთხვევა 13 დეკემბერს მოხდა. გიორგი ნავერიანი და კარლო ხერგიანი თეთნულდზე აპირებდნენ ასვლას, წანერი-ჭუბერის ქედზე მათ ქარბუქმა მოუსწრო, შემდეგ კი ზვავი წამოვიდა, რომელმაც ორივე მოიყოლა. თავის დაღწევა და უკან დაბრუნება მხოლოდ ნავერიანმა მოახერხა.