ჟურნალმა „თაიმმა" 2010 წლის ადამიანად სოციალური ქსელის „ფეისბუქის" დამაარსებელი და მთავარი აღმასრულებელი მარკ ცუკერბერგი დაასახელა.
ჟურნალი „თაიმი" ყოველწლიურად ასახელებს წლის ადამიანს, რომელმაც ჟურნალის აზრით, ცუდი თუ კარგი საქმეებით ყველაზე დიდ ზეგავლენას ახდენს წლის მოვლენებზე.
„წელს „ფეისბუქის" მომხმარებელთა რიცხვმა 500 მილიონს გადააჭარბა.
„ფეისბუქის" მასშტაბები ჩვენი ცხოვრების ტრანსფორმირებას ახდენს. პლანეტაზე ათიდან ერთი ადამიანი „ფეისბუქის" ქსელშია ჩართული - აქ არ იგულისხმება ჩინეთი, სადაც დედამიწის მოსახლეობის მეხუთედი ცხოვრობს", - განაცხადა ჟურნალ „თაიმის" რედაქტორმა რიჩარდ სტენგელმა, NBC -ის სატელევიზიო გადაცემა „Today"-ში წლის ადამიანის დასახელებისას.
„ეს არის არა მხოლოდ ახალი ტექნოლოგია, არამედ სოციალური ინჟინერია. ის ცვლის ჩვენს შორის ურთიერთობის მეთოდებს და ცვლის ისე, რისი მომსწრენიც ჩვენ ჯერ არ ვყოფილვართ".
2004 წელს 19 წლის ცუკებერგმა, ჰარვარდის უნივესიტეტის მეორე კურსზე სწავლისას, დაარსა ვებსერვისი Thefacebook.com მან აღნიშნული ვებსერვისი სტუდენტთა საერთო საცხოვრებელში შექმნა. ჟურნალ „თაიმის" მონაცემებით, ამჟამად ის მსოფლიოში ერთ-ერთი ყველაზე ახალგაზრდა მილიარდერია და მის მფლობელობაში მყოფი კომპანია 2010 წელს დაახლოებით 2 მილიარდი დოლარის მოგების მიღებას ელის.
„თაიმის" ვებგვერდზე მიმდინარე გამოკითხვაში მომხმარებლები წლის ადამიანად WikiLeaks -ის დამფუძნებლის ჯულიან ასანჟის დასახელებას უჭერდნენ მხარს, თუმცა სტენგელმა განაცხადა, რომ „თაიმის" რედაქტორებმა და კორესპონდენტებმა ერთმანეთთან, წარსულში გამარჯვებულებთან და მსოფლიოში ცნობილ ადამიანებთან კონსტულტაციების შედეგად გადაწყვიტეს, რომ აღნიშნული წოდება ცუკერბერგისთვის მიენიჭებინათ. წლის ადამიანის ნომინაციაზე „თაიმის" მესვეურები ასევე განიხილავდნენ კონსერვატიულ პოლიტიკურ მოძრაობას "Tea Party"-ს, ჯულიან ასანჟის, ავღანეთის პრეზიდენტ ჰამიდ კარზაის და ჩილეს მაღაროში მოყოლილ 33 მაღაროელს.