დღეს, 17 დეკემბერს, ტრანსპორტის პროფკავშირები და "ქრისტიან-დემოკრატები" მძღოლების საბოლოო მოთხოვნებს სატენდერო კომისიას წარუდგენენ. ჩამოყალიბებულია 3 პრიორიტეტი, რის გათვალისწინებასაც სამარშრუტო ტაქსების მძღოლები და ხაზების მფლობელები ითხოვენ. შეთანხმების თანახმად, ტენდერში უნდა მონაწილეობდნენ ის ფირმები, ვისაც რეალური ავტოპარკი აქვთ, ახალ ხაზებზე პირველ რიგში უნდა შენარჩუნდნენ ის მძღოლები, რომლებიც დღეს არიან დასაქმებულები და სატენდერო პირობებში უნდა შეიცვალოს მანქანებისთვის ქულების მინიჭების წესი.
სამარშრუტო ტაქსების მძოლებსა და ხაზების მფლობელებს პროფკავშირთა სახლში დღეს ტრანსპორტის პროფკავშირის თავმჯდომარე ლავრენტი ალანია, გიორგი ახვლედიანი და ჯაბა სამუშია შეხვდნენ. "ქრისტიან-დემოკრატები" სატენდერო კომისიას მძღოლების მოთხოვნების მაქსიმალურად გათვალისწინებას თხოვენ.
სამარშრუტო ტაქსებზე ტენდერი დედაქალაქის მერიამ გამოაცხადა. ტენდერი სამარშრუტო გადამზიდავი კომპანიის გამოსავლენად იმართება და 45 დღეს გაგრძელდება. დაინტერესებულ კომპანიებს 14 იანვრამდე შეუძლიათ სატენდერო პირობების გაცნობა, რომელიც გამოქვეყნდება პრესაში და განთავსდება თბილისის მერიის ვებგვერდზე.
მასალის გამოყენების პირობები
