დღეს, 17 დეკემბერს, 11:00 საათიდან, გაეროს სახლი თბილისში სასოფლო-სამეურნეო პროდუქციის ტრადიციულ გამოფენას უმასპინძლებს. უმაღლესი ხარისხის ხილ-ბოსტნეულისა და რძის ნაწარმი კაჭრეთისა და გორის მინისაწარმოების მიერაა დამზადებული.
მინისაწარმოები გაეროს განვითარების პროგრამის ხელშეწყობით შეიქმნა. მათი მიზანია ხელი შეუწყოს ადგილობრივი წარმოების განვითარებას და მხარი დაუჭიროს ფერმერებს საკუთარი პროდუქციის გადამუშავებასა და რეალიზებაში.
გარდა ამისა, პროფესიული კოლეჯების სტუდენტებისთვის მინისაწარმოები პრაქტიკული სწავლების ბაზას წარმოადგენენ.
კაჭრეთის მინისაწარმო 2009 წელს კაჭრეთის პროფესიული კოლეჯის ბაზაზე შექმნა. პროექტის დაფინანსება რუმინეთის მთავრობამ და გაეროს განვითარების პროგრამამ განახორციელეს. საწარმო აღჭურვილია თანამედროვე ტექნოლოგიური დანადგარებით, რაც სურსათის უვნებლობის საერთაშორისო სტანდარტების დაცვას უზრუნველყოფს. დღეს საწარმო 80-მდე მცირე ფერმერს ემსახურება. საწარმოში დამზადებული ხილფაფები, მურაბები, მარინადები და სასაუზმე კონსერვები იყიდება ბრენდით "კაჭრეთის ბაღებიდან".
გორის რძის გადამამუშავებელი საწარმო ევროკავშირის დაფინანსებით 2008 ომის შემდგომი დახმარების პროგრამის ფარგლებში გაიხსნა. უახლესი ტექნიკით აღჭურვილი საწარმო ადგილობრივ ფერმერებს ემსახურება, ხოლო გორის უნივერსიტეტის პროფესიული განათლების კურსების სტუდენტებისათვის პრაქტიკულ სასწავლებელს წარმოადგენს. უმაღლესი ხარისხის რძის პროდუქცია "ნებიერა" - ხაჭო, ყველი, მაწონი და არაჟანი, წარმატებით იყიდება თბილისის მსხვილ სუპერმარკეტებსა და გორის მარკეტებში.