იურიდიულ საქმეთა კომიტეტის თავმჯდომარე პავლე კუბლაშვილი ნახშირის მომპოვებლებისთვის მოსაკრებლის გადახდის წესის გამარტივების ინიციატივით გამოდის.
აღნიშნულთან დაკავშირებით საუბარია "ბუნებრივი რესურსებით სარგებლობისთვის მოსაკრებლის შესახებ" კანონში შესატანი ცვლილების შესახებ კუბლაშვილის თანაავტორობით მომზადებულ კანონპროექტში.
კანონპროექტის ინიციატორების შეფასებით, მოქმედი კანონი რთულ მდგომარეობაში აყენებს გარკვეული სახის წიაღისეულის მომპოვებლებს, კერძოდ, ნახშირის მოპოვების ლიცენზიის მფლობელებს უწევს გადაიხადოს მოსაკრებელი ლიცენზიით განსაზღვრული ჯამური ან წლიური მაქსიმალური ოდენობის შესაბამისად, რაც წამგებიანია და ინვესტორებს საქმიანობის შეჩერებისკენ უბიძგებს.
საკანონმდებლო ინიციატივის მიხედვით კი, ნახშირის მომპოვებლებს შესაძლებლობა ექნებათ, მოსაკრებელი ლიცენზიით განსაზღვრული მოპოვებული ბუნებრივი რესურსების მოცულობის მიხედვით გადაიხადონ.