ექსპერტ გია ხუხაშვილის შეფასებით, "ვარდების რევოლუციის" შედეგად მოსახლეობამ "ლამაზად შეღებილი ფასადი, შინაარსობრივად კი ძალიან მძიმე სურათი მიიღო".
"პოზიტივი ბევრი მიმართულებით შეინიშნება - სახელმწიფო სისტემა ბევრად უფრო მობილური და მოქნილი, ფუნქციონირებადი გახდა, მაგრამ იმ კუთხით, რაც სახელმწიფოებრივად არის განსაკუთრებით მნიშვნელოვანი, ჩვენ უკუსვლა გვაქვს, მათ შორის სიტყვის თავისუფლების, ზოგადად დემოკრატიული ინსტიტუტების სიძლიერის, საზოგადოებრივი სექტორის, ეკონომიკის მიმართულებით, რომელიც დამონებულია. გარდა ამისა, უკუსვლა გვაქვს საგარეო პოლიტიკური ვექტორის მიმართულებით - ფაქტიურად ქვეყანას საგარეო ქმედებების დიაპაზონი მაქსიმალურად შეზღუდული აქვს", - განუცხადა ხუხაშვილმა "ჯი-ეიჩ-ენს" "ვარდების რევოლუციის" შედეგებზე კომენტირებისას, საიდანაც ხვალ, 23 ნოემბერს, 6 წელი სრულდება.
ამასთან, ექსპერტის განმარტებით, "ვარდების რევოლუციის" გზით არჩეულმა ხელისუფლებამ ვერც ქვეყნის დაქუცმაცების თავიდან აცილება შეძლო და ქვეყანა გეოპოლიტიკური ფუნქციის დაკარგვის საშიშროების წინაშეც აღმოჩნდა.
"აქედან გამომდინარე, შევარდნაძის ხელისუფლების შეცვლით, ხალხმა რაღაც მიმართულებით მოიგო, რაღაცაში წააგო, მაგრამ ვფიქრობ, საერთოOბალანსი მკვეთრად უარყოფითია, ანუ ზარალი ბევრად დიდია. რევოლუციის მთავარი დანაპირები, რომ ქვეყნის გამთლიანება, დემოკრატიზაცია, ეკონომიკური განვითარება, სოციალური რისკების შემცირება უნდა მომხდარიყო, ჯერ ისევ შეუსრულებელია", - განმარტა მან.
შეგახსენებთ, რომ ხვალ 23 ნოემბერს, "ვარდების რევოლუციიდან" 6 წელი სრულდება.