პარლამენტის ვიცე-სპიკერის, გიგი წერეთლის შეფასებით, "ვარდების რევოლუციის" მთავარი მიღწევა ისაა, რომ ქართული სახელმწიფო შედგა.
"ქართული სამხედრო შედგა და ის არსებობს იმ პარამეტრებით, რომელიც ძალიან უახლოვდება განვითარებული სახელმწიფოების რიგებს. რა თქმა უნდა, ყველაფერი დასრულებული არ არის, რეფორმების პროცესი გრძელდება, მაგრამ მთავარია, სახელმწიფო ინსტიტუტები გაძლიერდა და წლების განმავლობაში ძალიან ბევრი მიმართულებით წავედით წინ", - განუცხადა გიგი წერეთელმა "ჯი-ეიჩ-ენს" "ვარდების რევოლუციის" შედეგებზე კომენტირებისას.
რაც შეეხება უარყოფით შედეგებს, ქვეყნისთვის ყველაზე მძიმე მოვლენად უმრავლესობის წარმომადგენელი რუსეთთან ომს ასახელებს, თუმცა აქვე იმასაც განმარტავს, რომ "ომი არ იქნებოდა, საქართველოს რომ საქმე ცუდად ჰქონოდა".
"დარწმუნებული ვარ რუსეთთან ომი არ იქნებოდა, საქართველოს საქმე ცუდად რომ ჰქონოდა. ჩვენი არაკეთილმოსურნის გაღიზიანება სწორდ იმან გამოიწვია, რომ ჩვენ ვვითარდებით. ამიტომაც მოინდომეს მათ ჩვენთვის გზის გადაღობა, რაც საბოლოო ჯამში, ვერ მოახერხეს", - განმარტავს დეპუტატი.
საერთო ჯამში, გიგი წერეთლის შეფასებით, "ვინც როგორ არ უნდა აკრიტიკოს "ვარდების რევოლუცია", ის უაღრესად პროგრესული მოვლენაა, რომელიც სიახლის, უკეთესის შექმნის და ცივილიზებულ გარემოში ცხოვრების სურვილს უკავშირდება, რის გზაზეც ქვეყანა უკვე დგას".
შეგახსენებთ, რომ ხვალ, 23 ნოემბერს, "ვარდების რევოლუციიდან" 6 წელი სრულდება.
