ძლიერმა ქარმა და სეტყვამ გურჯაანის მუნიციპალიტეტი დააზარალა. ადიდებულმა ხევმა გაარღვია კალაპოტი და სოფელ ძირკოკში და ჭანდარში საავტომობილო გზაზე გადავიდა, რის შედეგადაც სახელმწიფოებრივი მნიშვნელობის გზის ამ მონაკვეთზე მოძრაობა პარალიზებულია. დასეტყვილია სასოფლო სამეურნეო ნაკვეთები და დატბორილია საცხოვრებელი სახლების პირველი სართულები.
დაიტბორა ასევე ქალაქ გურჯაანის ცენტრალური ქუჩა და ლაგოდეხის მიმართულებით გზაზე მოძრაობა შეფერხებულია. სეტყვის შედეგად ვენახები და ხეხილის ბაღები გაანადგურა.
სტიქიის შედეგად დაზიანდა ელექტროგადამცემი ხაზები და საყრდენები, რის შედეგადაც რამდენიმე სოფელი ელექტროენერგიის გარეშეა დარჩენილი.
20 წუთიანი სეტყვისა და ქარიშხლის შედეგად დატბორილ ქუჩებში საგანგებო სიტუაციების სამსახურის თანამშრომლები მუშაობენ და გზებს წმენდენ. მობილიზებულია პოლიცია.
