არასამთავრობო ორგანიზაციამ Georgian Environmental Outlook (GEO) პროექტის „მწვანე ენერგიის ტექნოლოგიების გავრცელების დაჩქარება ტურიზმის სექტორში“ ფარგლებში შეიმუშავა გზამკვლევი სასტუმროებისთვის. კატალოგის სახით წარმოდგენილი გზამკვლევი მოიცავს ინფორმაციას მცირე და საშუალო ზომის სასტუმროებისათვის გამოყენებადი ენერგოეფექტური ტექნოლოგიების შესახებ და ეყრდნობა სექტორში ბაზრის კვლევას. კატალოგს GEO საქართველოში 500-მდე სასტუმროს გადასცემს. დამატებით, კატალოგი ელექტრონული ვერსიის სახით გავრცელდება.
აღნიშნულ პროექტს საქართველოს სასტუმროებში მწვანე ენერგიის ტექნოლოგიების გავრცელების ხელშესაწყობად GEO ახორციელებს საერთაშორისო ორგანიზაციების მხარდაჭერით: GIZ-ის კლიმატის საერთაშირისო ინიციატივის (IKI-ის) მცირე გრანტების პროგრამის ფარგლებში, გერმანიის ეკონომიკის საქმეთა და კლიმატის ცვლილების ფედერალური სამინისტროსა (BMWK) და ფედერალური საგარეო საქმეთა ოფისის (AA) ფინანსური მხარდაჭერით. პროექტის მიზანია, ხელი შეუწყოს მასპინძლობის სექტორში მომუშავე მცირე და საშუალო ზომის სასტუმროებს ენერგოეფექტური მიდგომების შესახებ ინფორმაციის მიღებასა და ტექნოლოგიების დანერგვაში.
სასტუმროებისთვის შექმნილ კატალოგში თავმოყრილია ინფორმცია პრიორიტეტული ენერგოეფექტური და მწვანე ენერგიის ტექნოლოგიების, მათი ხარჯსარგებლიანობის და დაფინანსების წყაროების შესახებ. გზამკვლევის მომზადებას წინ უძღოდა კვლევა, რომელიც GEO-მ სოციოლოგებთან ერთად ჩაატარა. კატალოში თავმოყრილია ინფორმაცია სწორედ იმ საჭიროებებზე დაყრდნობთ, რაც კვლევისას სასტუმროების მფლობელებთან გასაუბრებების შედეგად გამოვლინდა. მათ შორის, გამოცემა თავს უყრის ინფორმაციას პრიორიტეტულ ტექნოლოგიებსა და მასალებზე, სამუშაოების მოცულობაზე, თითოეული ტექნოლოგიის მომწოდებლებსა და ფასებზე. კატალოგში ასევე წარმოდგენილია ინფორმაცია კომერციული ბანკებისა და დონორთა პროექტების დახმარებით ენერგოეფექტურობის და მწვანე ენერგიის ღონისძიებების დაფინანსების შესაძლებლობების შესახებ.
გზამკვლევის გავრცელება სასტუმროებისთვის პროექტის მეორე ეტაპია. პროექტი ითვალისწინებს, პირველ რიგში, მომზადებული ინფორმაციის მცირე და საშუალო ზომის სასტუმროებისთვის მიწოდებას. ასევე სემინარებსა და სხვა ტიპის ღონისძიებებს მასპინძლობის სექტორში ინფორმაციის ეფექტური გაცვლისათვის. საფინალო ეტაპზე კი, შერჩეულ სასტუმროებში, დონორი ორგანიზაციის თანადაფინანსებით, სადემონსტრაციო პროექტებიც შეიქმნება - ენერგოეფექტური ტექნოლოგიები დაინსტალირდება. პროექტის სამიზნე რეგიონებია აჭარა და მცხეთა-მთიანეთი: მცხეთის, ყაზბეგის, ქობულეთის, ხელვაჩაურის და ბათუმის მუნიციპალიტეტში განლაგებული მცირე და საშუალო ზომის სასტუმროები.
კატალოგი „მწვანე ენერგია და ენერგოეფექტური ტექნოლოგიები - გზამკვლევი სასტუმროებისთვის“ შეგიძლიათ იხილოთ ამ ბმულზე : https://geo.org.ge/wp-content/uploads/2023/05/Green-Energy-and-RE-Technologies-Catalogue-1.pdf
