რუსეთის თავდაცვის მინისტრი სერგეი შოიგუ აცხადებს, რომ კიევმა ფრონტის სხვადასხვა მონაკვეთზე დიდი ხნის წინ დაპირებული კონტრშეტევა დაიწყო.
შოიგუ ამტკიცებს, რომ უკრაინელმა სამხედროებმა ვერცერთ მონაკვეთზე წარმატებას ვერ მიაღწიეს და დიდი დანაკარგები განიცადეს.
მისი თქმით, კიევმა ტექნიკისა და ცოცხალი ძალის დიდი კონცენტრაცია მოახდინა. მისი სიტყვებით, 4 ივნისს უკრაინის შეიარაღებული ძალების 23-ე და 31-ე მექანიზირებულ ბრიგადებს ჰქონდათ მცდელობა ხუთი მიმართულებით. შოიგუ ამტკიცებს, რომ უკრაინის ძალებმა წარატებას ვერ მიაღწიეს და დიდი ზარალი განიცადეს. მისი მტკიცებით, დაკარგეს 300 სამხედრო, 16 ტანკი, 26 საბრძოლო ჯავშანმანქნა და 14 ავტომობილი.
მისივე თქმით, 5 ივნისს კიევმა შვიდი მიმართულებით სცადა შეტევა, თუმცა კიდევ ურო მეტი დანაკარგი განიცადა.
შოიგუს მტკიცებით, სამი დღის განმავლობაში უკრაინამ 3 175 სამხედრო და 52 ტანკი დაკარგა.
ასევე, შოიგუმ განაცხადა, რომ გასულ ღამეს კახოვკის ჰიდროელექტროსადგური კიევმა ააფეთქა რამაც ტერიტორიების დატბორვა გამოიწვია. მისივე თქმით, კიევმა ჩაიდინა ტერორისტული თავდასხმა, რომელსაც ექნება გრძელვადიანი ეკოლოგიური შედეგები.
