უკრაინის საგარეო საქმეთა სამინისტრო საერთაშორისო თანამეგობრობას მოუწოდებს მკაცრად დაგმოს რუსეთის მიერ კახოვკის ჰიდროელქტროსადგურის აფეთქება. ამის შესახებ ნათქვამია უკრაინის საგარეო საქმეთა სამინისტროს განცხადებაში.
„კახოვკის ჰიდროელექტროსადგურის კაშხლის აფეთქება ტექნოგენური და ეკოლოგიური ტერორიზმია, ბოლო ათწლეულების განმვალობაშუ ყველაზე დიდი ტექნოგენური კატასტროფა ევროპაში, რუსეთის მიერ უკრაინელების წინააღმდეგ მორიგი გენოციდის გამოვლინება. ეს არის კრემლის პასუხი იმ ქვეყნებს, რომლებიც რუსეთს სამშვიდობო მოლაპარაკებებისკენ მოუწოდებენ“, - აღნიშნულია განცხადებაში.
უკრაინის საგარეო საქმეთა სამინისტრო მოუწოდებს საერთაშორისო საზოგადოებას შეუერთდეს ვოლოდიმირ ზელენსკის სამშვიდობო ფორმულის განხორციელებას. კერძოდ, ეკოციდის საწინააღმდეგო ქმედებებთან, ბირთვულ და ენერგეტიკულ უსაფრთხოებასთან დაკავშირებულ პუნქტებში.
ასევე უკრაინის საგარეო უწყება მიმართავს „დიდი შვიდეულის“ ქვეყნებსა და ევროკავშირს, განიხილონ რუსეთის წინააღმდეგ ახალი სანქციები, კერძოდ, სანქციები დაუწესდეს რუსეთის სარაკეტო წარმოებასა და ატომურ ინდუსტრიას.
უკრაინა ასევე აპირებს მოიწვიოს გაეროს უსაფრთხოების საბჭოს მორიგი სხდომა და გაიტანოს რუსეთის მიერ განხორციელებული ტერაქტის საკითხი ატომური ენერგიის საერთაშორისო სააგენტოს სხდომაზე, ასევე აამოქმედოს ევროკავშირის სამოქალაქო დაცვის მექანიზმი.
რუსეთის საოკუპაციო ძალებმა დღეს დილით ააფეთქეს ხერსონის ოლქში მდებარე კახოვკის ჰიდროელექტროსადგური. ხერსონიდან მიმდინარეობს მოსახლეობის ევაკუაცია. რამდენიმე დასახლებული პუნქტი უკვე ნაწილობრივ ან მთლიანად დატბორილია.
