ინდონეზიის მიერ შეთავაზებული სამშვიდობო გეგმა რუსეთსა და უკრაინას შორის ვერ იმუშავებს, - ამის შესახებ უკრაინის საგარეო საქმეთა ოფიციალურმა წარმომადგენელმა ოლეგ ნიკოლენკომ განაცხადა.
ნიკოლენკომ აღნიშნა, რომ უკრაინასა და რუსეთს შორის რეფერენდუმის ჩატარებისთვის სადავო ტერიტორიები არ არსებობს.
„რუსეთმა უნდა დატოვოს უკრაინის ტერიტორიები, უკრაინამ კი უნდა აღადგინოს თავისი ტრიტორიული მთლიანობა საერთაშორისოდ აღიარებულ საზღვრებში. ალტერნატიული სცენარი ვერ იარსებებს“, - განაცხადა ნიკოლენკომ.
მან ასევე მწვავედ გააკრიტიკა გეგმის სხვა პუნქტებიც, რომლებიც ინდონეზიის მხარემ წარადგინა - ცეცხლის შეწყვეტისა და დემილიტარიზებული ზონების შექმნასთან დააკვშირებით.
„რუსეთი ახლა ცდილობს ჩაშალოს უკრაინის კონტრშეტევა. ცეცხლის შეწყვეტა უკრაინიდან რუსული ჯარის გაყვანის გარეშე, რუსეთს დროის მოგების, გადაჯგუფების, ოკუპირებილ ტერიტორიებზე გამაგრებისა და აგრესიის ახალი ტალღისთვის ძალების შეკრების შესაძლებლობას მისცემს“, - განაცხადა ნიკოლენკომ.
შეგახსენებთ, ინდონეზიამ უკრაინასთან დაკავშირებით თავისი სამშვიდობო გეგმა წარადგინა.
როგორც ინდონეზიის თავდაცვის მინისტრმა, პრაბოვო სუბიანტომ განაცხადა, სამშვიდობო გეგმის მთავარი პუნქტებია: ცეცხლის დაუყოვნებლივ შეწყვეტა, სამშვიდობო ძალების კონტროლქვეშ დემილიტარიზებული ზონის შექმნა და გაერო-ს ეგიდით ახალი რეფერენდუმების გამართვა „სადავო ტერიტორიებზე“.
სუბიანტოს არ განუმარტავს, რა იგულისხმება „სადავო ტერიტორიებში“.
