დემოკრატიის კვლევის ინსტიტუტი (DRI) ეხმიანება 2 ივნისს პარლამენტთან სამოქალაქო აქტივისტებისა და უფლედამცველების დაკავების ფაქტებს და ცახადბეს, რომ მშვიდობიანი პროტესტის დროს აქციის მონაწილეთა დაკავება საფრთხეს უქმნის დემოკრატიულ ღირებულებებს
„საჯაროდ გავრცელებული ინფორმაციით, 2 ივნისს, საქართველოს პარლამენტის მიმდებარე ტერიტორიაზე, პლაკატზე გაკეთებული წარწერის გამო დააკავეს რამდენიმე პირი, მათ შორის, ადვოკატები, არასამთავრობო ორგანიზაციის წარმომადგენლები, სამოქალაქო აქტივისტები - შოთა თუთბერიძე, ედუარდ მარიკაშვილი, საბა ბრაჭველი, ლაშა ჯანჯღავა, ლევან ნიშნიანიძე. მათი ნაწილი ამ დრომდე დაკავებულია და რამდენიმე მათგანის ადგილსამყოფელი ჯერ კიდევ უცნობია.
პროტესტის მთავარ მიზეზს ხელისუფლების ანტიდასავლური პოლიტიკა წარმოადგენდა. მედია-საშუალებების მიერ გავრცელებული ინფორმაციის მიხედვით, აქცია ატარებდა მშვიდობიან ხასიათს. პლაკატზე არსებული წარწერის გამო, აქციის მონაწილეთა დაკავება სცდება მოქმედ კანონმდებლობას და დაუსაბუთებლად, არამართლზომიერად ზღუდავს გამოხატვის თავისუფლებას, ამასთან ეწინააღმდეგება კონსტიტუციურ პრინციპებსა და საერთაშორისო სტანდარტებს. სამართალდამცავების მსგავსი მიდგომა წარმოადგენს დემოკრატიისთვის საფრთხის შემცველ ქმედებას, რაც შესაძლოა მანკიერ პრაქტიკად იქცეს.
DRI-ის შეფასებით, აქციის მონაწილეთა ქცევა არ გასცდენია კანონით დადგენილ ფარგლებს. სამართალდამცავების მხრიდან ადმინისტრაციული წესით პირების დაკავება, როგორც უფლების შეზღუდვის რადიკალური ზომის გამოყენება, მათ შორის, ბოლო პერიოდში განვითარებული მოვლენები, წარმოადგენს განსხვავებული აზრის წინააღმდეგ ხელისუფლების მიზანმიმართულ ქმედებას.
DRI მოუწოდებს:
შინაგან საქმეთა სამინისტროს
დარჩეს კანონის ფარგლებში და დაიცვას შეკრებისა და გამოხატვის თავისუფლება.
დაუყოვნებლივ გაათავისუფლოს 2 ივნისის აქციაზე დაკავებული პირები.
სპეციალურ საგამოძიებო სამსახურს:
დაუყოვნებლივ შეისწავლოს და მოახდინოს სათანადო რეაგირება 2023 წლის 2 ივნისს საქართველოს პარლამენტის მიმდებარე ტერიტორიაზე აქციის მონაწილეთა დაკავების ფაქტებზე და შეამოწმოს სამართალდამცავთა ქცევის სამართლებრივი საფუძველი და კანონიერება“, - ნათქვამია განცხადებაში.
