ისრაელში საქართველოს საელჩოს, აჭარის ავტონომიური რესპუბლიკის განათლების, კულტურისა და სპორტის სამინისტროსა და აჭარის ტურიზმისა კურორტების დეპარტამენტის მხარდაჭერითა და ორგანიზებით, 22 და 23 მაისს საქართველოს დამოუკიდებლობის დღისადმი მიძღვნილი საღამოები ჩატარდა.
22 მაისს, ისრაელში საქართველოს საელჩოს მიწვევით და ქალაქ ბათუმის მასპინძლობით საქართველოს საღამო გაიმართა. იერუსალიმის ძველი უბნის ერთ-ერთ ულამაზეს სივრცეში წარმოდგენილი იყო ქართული ღვინო და ტკბილეული, ქართული ცეკვის და სიმღერის ანსამბლები, ასევე ჩატარდა კულინარიული მასტერკლასები და 2000-მდე სტუმარი ქართულ ხალხურ შემოქმედებასა და კულინარიას ეზიარა.
23 მაისს, იერუსალიმში, ბათუმის სახელმწიფო მუსიკალური ცენტრის სიმფონიური ორკესტრმა დავით მუქერიას დირიჟორობით, საქართველოს საელჩოს ისრაელში და აჭარის ავტონომიური რესპუბლიკის განათლების, კულტურისა და სპორტის სამინისტროს ორგანიზებით, საქართველოს დამოუკიდებლობის დღისადმი მიძღვნილ ქართული მუსიკის კონცერტი გამართა!
კონცერტზე შესრულდა: ზაქარია ფალიაშვილის, ვიქტორ დოლიძის, დიმიტრი არაყიშვილის, სულხან ცინცაძის, რევაზ ლაღიძის, ლია იაშვილის, ვაჟა აზარაშვილისა და სოსო ბარდანაშვილის მუსიკა. მუსიკის ვერსიის ავტორი გახლდათ ქართველი კომპოზიტორი არჩილ გიორგობიანი.
მონაწილეობდნენ: სოფო ხალვაში, ხათუნა დონდუა, აჩიკო გოგიტიძე, მორის მელაძე და ბათუმის სახელმწიფო მუსიკალური ცენტრის საოპერო დასის სოლისტები: სულხან ჯაიანი და ოთარ (ბაჩო) ნაკაშიძე.
საქართველოს დამოუკიდებლობის დღისადმი მიძღვნილი მიღება იერუსალიმში ყოფილი ქართული მონასტრის ტერიტორიაზე გაიმართა, სადაც 1932 წელს, სამუელ ქართველთა ეპისკოპოსის საფლავის ქვა არის აღმოჩენილი და რომელიც მოწმობს ქართველების კვალს წმინდა მიწაზე.
აღნიშნული წარწერა ისრაელის სიძველეთა სამსახურთან თანამშრომლობით, ბათუმის სიმფონიური ორკესტრის კონცერტის დროს სცენაზე იყო წარმოდგენილი.
მიღების გარე სივრცეში მოწყობილ ორ სცენაზე, რომელსაც 1200 მოწვეული სტუმარი ესწრებოდა, ერთმანეთს ენაცვლებოდნენ ქ. ბათუმის ცეკვის ანსამბლი “ხორუმი”; ანსამბლი “ბათუმი” და 6 თვის წინ საელჩოს ხელშეწყობით ჩამოყალიბებული ბავშვთა ცეკვის და სიმღერის ანსამბლები.
ქართული კულტურის დღეების მხარდაჭერისთვის დიდი მადლობა აჭარის განათლების, კულტურისა და სპორტის სამინისტროს, პირადად მინისტრს, ქალბატონ მაია ხაჯიშვილს.
ამ მნიშვნელოვანი დღეების მასპინძლობისა და ორგანიზებისთვის გულითად მადლობას მოვახსენებთ საქართველოს ელჩს ისრაელში, ბატონ ლაშა ჟვანიას.
