დაჯგუფება „ვაგნერის“ მებრძოლები ქალაქ ბახმუტიდან გადიან, რათა ძალები აღიდგინონ და ზურგში გადაჯგუფდნენ, რადგან ქალაქსა და მის შემოგარენში რუსეთის შეტევითი ოპერაციები მცირდება.
ამის შესახებ ნათქვამია ამერიკის ომის შემსწავლელი ინსტიტუტის (ISW) მორიგ ანგარიშში.
უკრაინის თავდაცვის სამინისტყროში აღნიშნავენ, რომ უკრაინის არმია იკავებს დომინანტ სიმაღლეებს ბახმუტიდან ჩრდილოეთითა და სამხრეთით, ამასთან უკრაინის ძალებმა 26 და 27 მაისს შეწყვიტეს საბრძოლო მოქმედებები სხვა ამოცანების შესრულების მიზნით. უკრაინის ძალები კვლავ აკონტროლებენ პოზიციებს ბახმუტის სამხრეთ-დასავლეთ გარეუბანში. უსაფრთხობის საბჭოს მდივნის ოლექსი დანილოვის განცხადებით, „ვაგნერის“ მებრძოლები ქალაქ ბახმუტიდან გადიან და სამ ადგილზე ჯგუფდებიან. პრიგოჟინი კი ამბობდა, რომ მისმა მებრძოლებმა ბახმუტიდან გასვლა 27 მაისს დაიწყეს.
„პრიგოჟინის განცხადებები, სავარაუდოდ, სიმართლეს შეესაბამება, იმის გათვალისწინებით, რომ შემცირებულია რუსეთის შეტევითი შესაძლებლობები ბახმუტის ირგვლივ“, - აღნიშნულია ISW-ში.
ამასთან, ანალიტიკოსები აღნიშნავენ, რომ „ვაგნერელების“ შესაცვლელად რუსეთის სამხედრო სარდლობამ ბახმუტში „დონეცკის სახალხო რესპუბლიკის“ მებრძოლების გადასროლა დაიწყო.
„რუსეთის მიერ „დონეცკის სახალხო რესპუბლიკიდან ქვედანაყოფების გადასროლამ ბახმუტში შესაძლოა, შეამციროს რუსეთის შეტევითი მოქმედებები ავდიივკა-დონეცკის ხაზზე“, - აღნიშნავენ ISW-ში.
მანამდე ინსტიტუტის ექსპერტების შეფასებით, რუსეთის სამხედრო სარდლობა აქტიურად გზავნიდა „დონეცკის სახალხო რესპუბლიკის“ სხვადასხვა ელემენტებს ავდიივკა-დონეცკის ფრონტის ხაზზე. აღნიშნულია, რომ ბოლო დღეებში რუსეთის შეტევები ავდიივკა-დონეცკის რაიონში შემცირდა, რაც შესაძლოა უკავშირდებოდეს „დონეცკის სახალხო რესპუბლიკის“ მებრძოლების გადასროლას ბახმუტში.