ოპოზიცია მიბრძანდეს კლინიკასთან და პატიმარ სააკაშვილს მოუწყოს აქცია, რატომ და როგორ მოხდა, რომ 2008 წლის ომის შემდეგ ოკუპანტის ხელში გადავიდა ჩვენი ტერიტორიის 20 პროცენტი, – ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.
„სპეკულაციის ბოლო დონეა აქტიურობა იმ ადამიანებისგან, უსამშობლო პირებისგან, რომლებიც 2008 წლის ომის შემდეგ ტაშის კვრით მიეგებნენ „ნაციონალური მოძრაობის“ მაშინდელ ლიდერს, მიხეილ სააკაშვილს, რომელიც ღვინით ხელში ეგებებოდა რუს ტურისტებს საქართველოში. ქართული მხარე საკუთარ მოქალაქეებს სანქციებს ვერ დაუწესებს. რაც შეეხება ფრენების აღდგენის საკითხს, კიდევ ერთხელ ყველას გასაგონად, ეს არ იყო ქართული მხარის გადაწყვეტილება და ვერ იქნებოდა ქართული მხარის გადაწყვეტილება. რუსეთმა ინდივიდუალურად შეწყვიტა ფრენები და ინდივიდუალურად აღადგინა. ასე რომ, თუკი რაიმე სახის აქცია უნდათ, ვინმეს გაუმართონ, მიბრძანდნენ კლინიკასთან, სადაც პატიმარი სააკაშვილი იმყოფება და იქ მოუწყონ აქცია, რატომ და როგორ მოხდა, რომ 2008 წლის ომის შემდეგ ჩვენმა ქვეყანამ ამხელა ტერიტორიები დაკარგა და ოკუპანტის ხელში გადავიდა ჩვენი ტერიტორიის 20 პროცენტი“, – განაცხადა მათიკაშვილმა.
ოპოზიციამ პირდაპირი ფრენების აღდგენის გასაპროტესტებლად, დღეს პარლამენტის შენობასთან აქცია დაგეგმა.