ნატო ჩხეიძე რატომ აპელირებს ნიშნიანიძეზე, სრულიად გაუგებარია, რადგან ვისაც მხარი დაუჭირა და გახდა იუსტიციის საბჭოს წევრი, მათ შორის ეს გვარი საერთოდ არ ფიგურირებს, – ამის შესახებ „ნაციონალური მოძრაობის“ წევრმა, თინა ბოკუჩავამ განაცხადა.
მისი თქმით, არ არსებობს არგუმენტი, რომელიც დეპუტატების გუშინდელ ქმედებას გაამართლებს.
“ბუნებრივია, ბუნდოვანი და არადამაჯერებელი იქნება ნებისმიერი რამ, რაც შეიძლება მათ თქვან ამ კონკრეტულ საკითხზე, რადგან არ არსებობს არგუმენტი, რომელიც გუშინდელ ქმედებას გაამართლებს, რაც მდგომარეობს იმაში, რომ მათ გააძლიერეს სასამართლო კლანი. არანაირი წინასწარი შეთანხმება არ არსებობდა და ამას დაადასტურებენ არამხოლოდ ჩვენი ფრაქციის წევრები, არამედ სხვა დეპუტატებიც, ისინი იყვნენ ამ გადაწყვეტილების ავტორები და მოუწიათ პოლიტიკური პასუხისმგებლობის აღება, რაც აიღეს იმით, რომ მოუწიათ გასულიყვნენ ფრაქციიდან. ნიშნიანიძის კონტექსტი სრულიად გაუგებარია და რატომ აპელირებს ახლა ეს ადამიანი ნიშნიანიძეზე, რადგან იმ სამ კანდიდატს შორის, რომელთაც მათ მხარი დაუჭირეს და გახდნენ იუსტიციის უმაღლესი საბჭოს წევრები, ეს გვარი არ ფიგურირებს, შესაბამისად, ნიშნიანიძის გვარის მოყვანა ვერ ახსნის მხარდაჭერას იმ სამი კანდიდატის, რომლებიც უკვე გახდნენ იუსტიციის უმაღლესი საბჭოს წევრები. ეს არის ყოველგვარ საფუძველს მოკლებული არგუმენტაცია, რა დეტალებშიც არ უნდა შევიდეთ, გამართლება ამ საქციელს უბრალოდ, არ ექნება. ამიტომ არ ვთვლი საჭიროდ ამ დეტალებში შევიდე. ერთი, რაც შემიძლია გითხრათ არის ის, რომ არანაირი წინასწარი შეთანხმება, გარიგება, მოლაპარაკება, კანდიდატების გაცვლა და გამოცვლა, რაზეც თითქოსდა მინიშნებები იყო, არ არსებობს და ამას დაადასტურებენ სხვა ოპოზიციური დეპუტატებიც,”- ასე გამოეხმაურა თიან ბოკუჩავა ნატო ჩხეიძის კომენტარს.
იუსტიციის უმაღლესი საბჭოს წევრების კანდიდატებს კენჭისყრის დროს გუშინ მხარი დაუჭირა ხუთმა ოპოზიციონერმა დეპუტატმა – ნიკა მაჭუტაძემ, ბაჩუკი ქარდავამ, ნატო და როსტომ ჩხეიძეებმა და ასევე დილარ ხაბულიანმა.
ამასთან, გუშინვე ფრაქცია „ნაციონალური მოძრაობა“ დატოვეს ბაჩუკი ქარდავამ, ნიკა მაჭუტაძემ, ნატო და როსტომ ჩხეიძეებმა.