მე პირადად ვერ ვხედავ მათ ადგილს ფრაქცია „ერთიან ნაციონალურ მოძრაობაში“, ეს არის ჩემი პოზიცია. ფრაქციამ ამაზე უნდა იმსჯელოს, მაგრამ ამ გადაწყვეტილების შემდეგ, მე ვერ ვხედავ მათ ადგილს აქ, - განაცხადა „ერთიანი ნაციონალური მოძრაობის“ დეპუტატმა ანი წითლიძემ ოპოზიციონერი დეპუტატების შესახებ, რომლებმაც იუსტიციის უმაღლესი საბჭოს წევრების არჩევას დაუჭირეს მხარი.
“მაშინ, როდესაც ოპოზიციას ჰქონდა შესაძლებლობა იმის, რომ ეს პროცესი ჩაეგდო და კლანის წევრები არ გამხდარიყვნენ იუსტიციის უმაღლესი საბჭოს წევრები.
რაც შეეხება თვითონ უნდა ისაუბრონ მე ვამბობ, რომ მოვისმინე მათი არგუმენტები, მაგრამ ჩემთვის ეს არგუმენტები არის მიუღებელი და მე ვთვლი, რომ არასერიოზულია, იმიტომ რომ საქმე ეხება - ვიღაცამ შეცდომით მიაჭირა ხელი, ვიღაცამ ეს არ იცოდა, ვიღაცამ რამდენიმე კანდიდატს მისცა, ვიღაცამ იმას არ მისც.ა ეს არგუმენტები არის ძალიან არასწორი. საუბარი არის საქართველოს პარლამენტის წევრებზე, რომლებსაც აქვთ პასუხისმგებლობა ამ ყველაფერთან დაკავშირებით. ჩემთვის მარტივი არ არის კომენტარის გაკეთება ამ ადამიანებზე, რომლებიც ასევე წარმოადგენენ ჩვენს ფრაქციას.
ჩემი პირადი პოზიციაა, რომ ფრაქციამ უნდა იმსჯელოს, როგორ გაგრძელდეს შემდეგი თანამშრომლობა, მაგრამ ჩემი პირადი პოზიციაა, რომ ამ ადამიანებმა უნდა აიღონ პირადი პასუხისმგებლობა.
მე პირადად ვერ ვხედავ მათ ადგილს ფრაქცია „ერთიან ნაციონალურ მოძრაობაში“ ეს არის ჩემი პოზიცია. მე კიდევ ერთხელ ვამბობ, რომ ფრაქციამ ამაზე უნდა იმსჯელოს, მაგრამ ამ გადაწყვეტილების შემდეგ მე ვერ ვხედავ მათ ადგილს ფრაქცია „ერთიან ნაციონალურ მოძრაობაში“.
თვითონ გააკეთებენ განცხადებას, მე კიდევ ერთხელ ვიმეორებ, მათ ნაცვლად არ ვისაუბრებ. საზოგადოებამ მათგან უნდა მოისმინოს ეს არგუმენტები და თვითონ განსაჯოს რამდენად მისაღებია ეს არგუმენტები და რამდენად არა. ჩემი პოზიციაა, ის რომ ჩემთვის არგუმენტები, რაც მოვისმინე ისეთ სერიოზულ საკითხზე, რომელიც ეხება უმაღლესი საბჭოს წევრების არჩევას და სადაც ფაქტობრივად ხელისუფლებას ავარჩევინეთ კლანის წევრები, ჩემთვის ის არგუმენტები არ იყო სერიოზული, დანარჩენზე ისაუბრებენ თვითონ”, -განაცხადა ანი წითლიძემ.
არსებული ინფორმაციით, იუსტიციის უმაღლესი საბჭოს წევრების არჩევას როსტომ და ნატო ჩხეიძეებმა, ნიკა მაჭუტაძემ, ბაჩუკი ქარდავამ და დილარ ხაბულიანმაც დაუჭირეს მხარი.
პარლამენტმა იუსტიციის საბჭოს სამი არამოსამართლე წევრი აირჩია, დარჩენილ ორ ვაკანტურ თანამდებობაზე ასარჩევად კი, კენჭისყრა ხელახლა გაიმართება. პარლამენტმა დღევანდელ პლენარულ სხდომაზე იუსტიციის უმაღლესი საბჭოს არამოსამართლე წევრების ხუთ ვაკანტურ თანამდებობაზე ასარჩევად საერთო ჯამში 29 კანდიდატს უყარა კენჭი. ხმათა საჭირო რაოდენობა მიიღო ტრისტან ბენაშვილმა (93 მომხრე, ნული წინააღმდეგი), გიორგი გზობავამ (91 მომხრე, ნული წინააღმდეგი) და ზურაბ გურასპაშვილმა (93 მომხრე, ნული წინააღმდეგი). იუსტიციის უმაღლესი საბჭოს არამოსამართლე წევრის ასარჩევად, სულ მცირე, 90 ხმა იყო საჭირო. შესაბამისად, საბჭოს წევრების ასარჩევად საჭირო იყო როგორც უმრავლესობის, ისე ოპოზიციის ხმები. კენჭისყრა ფარული იყო, აქედან გამომდინარე, უცნობია, რომელმა ოპოზიციონერმა დეპუტატებმა დაუჭირეს მხარი არჩეულ კანდიდატებს.
ამჟამად იუსტიციის უმაღლეს საბჭოში ორი წევრის ვაკანტური ადგილია დარჩენილი. ოთხ კანდიდატს, რომლებმაც სხვებთან შედარებით მეტი ხმა მიიღეს, მეორე ტურში უყრიან კენჭს.
