ოპოზიციიდან იმ დეპუტატებმა, რომლებმაც მხარი დაუჭირეს იუსტიციის საბჭოს წევრების არჩევას, ეს დეპუტატები არიან გარიგებული არა ვინმესთან, არამედ კანდიდატის სტატუსთან, ძალიან პრინციპული პოზიცია დააფიქსირეს იმასთან დაკავშირებით, რომ სურთ კანდიდატის სტატუსის მიღება ჩვენი ქვეყნისთვის, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.
კობახიძის თქმით, თავის დროზე, ვინც ჩააწერინა კომისიას ეს საკითხი ერთ-ერთ მოთხოვნად, ეს იყო ალოგიკური.
„ამ მოთხოვანს ცალმხრივად ჩვენ ვერ შევასრულებთ. როდესაც გჭირდება 90 ხმა გარკვეული თანამდებობის პირების ასარჩევად, ეს ვერ იქნება სახელმწიფოსთვის წაყენებული მოთხოვნა, აქ არის საჯარო კონსენსუსი, როგორც უმრავლესობის, ასევე ოპოზიციის მონაწილეობით. ალოგიკური იყო ამ მოთხოვნის ჩაწერა ევროკომისიის მიერ ჩამოწერილ პუნქტებში და ვინც ჩააწერინა თავის დროზე ეს პუნქტი, მას ჰქონდა თვითმიზანი, რომ საქართველოს კიდევ ერთხელ არ მიეღო კანდიდატის სტატუსი. იგივე თვითმიზანი აქვს რადიკალურ ოპოზიციას და ამიტომ ცდილობდნენ, ჩაეგდოთ კანდიდატების არჩევის საკითხი, თუმცა ეს არ გამოუვიდათ. როგორც წარუმატებლები იყვნენ ისინი დღეს, იმედი მაქვს, ასეთივე წარუმატებლები იქნებიან იმ განზრახვაში, რასაც ჰქვია კანდიდატის სტატუსი დაბლოკვა ჩვენი ქვეყნისთვის“, – განაცხადა კობახიძემ.