„პრინციპულად მნიშვნელოვანია, რომ სახელით და გვარებით ვიცოდეთ, რადგან ამ ადამიანებმა მონაწილეობა მიიღეს იმაში, რომ იუსტიციის უმაღლეს საბჭოში სამი წევრი „ქართულმა ოცნებამ“ აირჩია როგორც „კლანის წევრი“- განაცხადა „ერთიანი ნაციონალური მოძრაობის“ დეპუტატმა, ანი წითლიძემ.
„ამ ადამიანებმა მონაწილეობა მიიღეს იმაში, რომ იუსტიციის უმაღლეს საბჭოში სამი წევრი „ქართულმა ოცნებამ“ აირჩია როგორც „კლანის წევრი“, ამიტომაც მათ მოუწევთ რატომ მიიღეს ეს გადაწყვეტილება. პრინციპულად მნიშვნელოვანია, რომ სახელით და გვარებით ვიცოდეთ, ერთია ნიკა მაჭუტაძე, რომელმაც დაადასტურა, დანარჩენთან დაკავშირებით ვარკვევთ, ესენი არ არიან „ნაციონალური მოძრაობის“ პარტიის წევრები, ფრაქციის წევრები კი სავარაუდოდ შეიძლება იყვნენ.“- ასე გამოეხმაურა ანი წითლიძე იუსტიციის უმაღლესი საბჭოს წევრების არჩევას, სადაც ხმა ოპოზიციის წევრებმაც მისცეს.
პარლამენტმა იუსტიციის უმაღლესი საბჭოს სამი არამოსამართლე წევრი აირჩია. დღევანდელ პლენარულ სხდომაზე კენჭისყრის შედეგად, ხმების საჭირო რაოდენობა მოაგროვეს ტრისტან ბენაშვილმა (93 მომხრე – ნული წინააღმდეგი), გიორგი გზობავამ (91 მომხრე, ნული წინააღმდეგი) და ზურაბ გურასპაშვილმა (93 მომხრე, ნული წინააღმდეგი).
საერთო ჯამში კენჭი უნდა ეყაროს 29 კანდიდატურას. იუსტიციის უმაღლესი საბჭოს არამოსამართლე წევრის ასარჩევად სულ მცირე 90 ხმაა საჭირო. შესაბამისად, საბჭოს წევრების ასარჩევად საჭიროა როგორც უმრავლესობის, ისე ოპოზიციის ხმები.
ოპოზიციის ნაწილმა კენჭისყრის დროს დარბაზი დატოვა, რის გამოც კენჭისყრები შეწყდა და ტექნიკური შესვენების შემდეგ გაგრძელდება. საპარლამენტო უმრავლესობის წარმომადგენლებმა აღნიშნეს, რომ საბოტაჟია ოპოზიციის მოქმედება, ჩააგდოს კანდიდატები.
ამჟამად იუსტიციის უმაღლეს საბჭოში ხუთი წევრის ადგილია ვაკანტური.